ئەمڕۆ بانگەشەی هەڵبژاردنی پەرلەمانی کوردستان کۆتایی دێت

ئاڤا نیوز

ئەمڕۆ بانگەشەی هەڵبژاردنی پەرلەمانی کوردستان کۆتایی دێت، حیزب و کاندیدەکان دوایین کەرنەڤاڵ و ئاهەنگیی جەماوەریی خۆیان بەڕێوە دەبەن لەسەرجەم شار و شارۆچکەکان.

 

وێنە گەورەکە: ئەمڕۆ سێشەممە 15-10-2024 بانگەشەی هەڵبژاردن بۆ پەرلەمانی کوردستان کۆتایی دێت، بەگوێرەی ئاماری کۆمسیۆنیش 66 پێشێلکاری و سکاڵا لەسەر بەڕێوەچوونی بانگەشە تۆمارکراون.

 

زانیاریی زیاتر: بانگەشەی هەڵبژاردن بۆ ماوەی 20 ڕۆژ بەردەوام بوو و کاتژمـێر 12ی شەو کۆتایی دێت، واتە پێنج ڕۆژ پێش هەڵبژاردنی گشتی کە بڕیارە 20ی ئەم مانگە بکرێت.

 

ڕاگەیێنراوی فەرمی: پێشتر کۆمیسیۆنی هەڵبژاردنەکانی عێراق ڕایگەیاند: 30 هەزار و 573 چاودێری لایەنەکان، سێ هەزار و 100 چاودێری ناوخۆیی و هەزار و 527 چاودێری نێودەوڵەتیی بۆ هەڵبژاردنی پەرلەمانی کوردستان تۆمار کراون، هاوکات هەزار و 283 کامێرای چاودێریی لە ناو بنکەی دەنگدانەکان جێگیرکراون، بەجۆرێک لەهەر بنکەیەکی دەنگدان چوار کامێرا و لەهەر وێستگەیەکیش دوو کامێرا دەدانرێت، بۆ چوار ناوەندی وردبینیش 50 کامێرای چاودێری دادەنرێن.

 

ئەمەش بزانە: دوو ملیۆن و 888 هەزار و 162 کەس لە هەرێمی کوردستان بۆ هەڵبژاردنی خولی شەشەمی پەرلەمانی کوردستان مافی دەنگدانیان هەیە، لەو ژمارەیەش دوو ملیۆن و 672 هەزار و 43 کەس لە دەنگدانی گشتی و 216 هەزار و 119 کەسیش لە دەنگدانی تایبەت دەنگ دەدەن.

 

باکگراوند: لەم خولەی پەرلەماندا ژمارەی كورسییەكان 100 كورسی دەبێت، هاوکات لەو ژمارەیە پێنج كورسییان بۆ كۆتایی پێكهاتەكان دیاری کراوە.