زیاتر لە 97 هەزار دەنگدەر لە پڕۆسەی دەنگدان بێبەش دەبن

ئاڤا نیوز

 

وادەی وەرگرتنەوەی کارتی بایۆمەتری دەنگدان کۆتایی هات، زیاتر لە 97 هەزار دەنگدەری گشتیی لە هەر چوار بازنەکە لەو پرۆسەیە بێبەش دەبن  و ناتوانن دەنگ بدەن.

 

وێنە گەورەکە: لە کۆی دوو ملیۆن و 899 هەزار و 615 هەزار دەنگدەر، لە بازنەکانی هەولێر، سلێمانی، دهۆک و هەڵەبجە، دوو ملیۆن و 801 هەزار و 672 کەس کارتی بایۆمەتری دەنگدانیان وەرگرتووەتەوە و دەتوانن بەشداری پڕۆسەکە بکەن.

 

لێدوانی فەرمی: د. ئەیسەر یاسین، گوتەبێژی ڕاگەیاندنی هەڵبژاردنی پەرلەمانی کوردستان بە ئاڤا نیوزی ڕاگەیاند، "سەرجەم دەنگدەرانی تایبەت کە ژمارەیان 215 هەزار و 960 کەسە کارتی بایۆمەتری دەنگدانیان وەرگرتووەتەوە، بەڵام 97 هەزار و 893 کەس بەهۆی وەرنەگرتنەوەی کارتی بایۆمەتری دەنگدان لە دەنگدانی گشتیی بێبەش دەبن."
 

ژمارەکان وادەڵێن: بەگوێرەی دوایین ئاماری کۆمیسیۆنی باڵای سەربەخۆی هەڵبژاردنەکانی عێراق، ژمارەی ئەو دەنگدەرانەی کارتی دەنگدانیان وەرنەگرتووەتەوە، بەمشێوەیەیە:-

هەولێر: لە کۆی یەک ملیۆن و 15 هەزار و 667 دەنگدەر، 22 هەزار  و 63 دەنگدەر کارتەکانیان وەرنەگرتووەتەوە و لە دەنگدان بێبەش دەبن.

سلێمانی و هەڵەبجە: لە کۆی یەک ملیۆن و 146 هەزار و 92 دەنگدەر، 65 هەزار  و 297 کەس کارتی بایۆمەتری دەنگدانیان وەرنەگرتووەتەوە لە دەنگدان بێبەش دەبن.

دهۆک: لەکۆی 737 هەزار و 856 دەنگدەر، 10 هەزار  و 593  کەس کارتی بایۆمەتری دەنگدانیان وەرنەگرتووتەوە و لە دەنگدان بێبەش دەبن.