بە فەرمانی خامنەیی هێرشەکان بۆ سەر هێزەکانی ئەمریکا لە عێراق و سووریا ڕاگیراون

ئاڤا نیوز

 

ئێران لەپێناو پاراستنی ڕەنجی چەند ساڵەی بۆ دروستکردنی گرووپە چەکدارەکان، فەرمانی پێکردوون هێرشەکانیان لە عێراق و سووریا بۆ سەر هێزەکانی ئەمریکا ڕابگرن، چونکە لە ئەگەری لەدەستدانیان ئێران یەکێک لە گرنگترین گۆڕەپانەکانی ڕووبەڕووبوونەوەی لەگەڵ ئەمریکا لەدەستدەدات.

 

ڕاگەیێنراوی فەرمی: وەزارەتی بەرگریی ئەمریکا ڕایگەیاند، ماوەی 16 ڕۆژە لە عێراق و سووریا هیچ هێرشێک نەکراوەتە سەر هێزەکانیان.

 

هۆکارە زانراوەکان: ڕۆژنامەی شەرقولئەوسەت بە پشتبەستن بە چەند سەرچاوەیەک هۆکاری ڕاگرتنی هێرشەکانی خستووەتەڕوو:

- بۆ خۆڕێکخستنەوە و خۆپاراستن لە ئەگەری هێرشی ئەمریکا لە داهاتوودا.

- پاراستنی حکومەتەکەی سوودانی لە ڕووخان.

- هەوڵێکە بۆ هێورکردنەوەی توڕەیی شەقامی عێراق لە ڕەفتاری گرووپە چەکدارەکان.

 

لەلایەکی دیکەوە: سەرچاوەکانی نزیک لە گرووپە چەکدارەکان ڕەتی دەکەنەوە، ڕاگرتنی هێرشەکان لەسەر فەرمانی ئیسماعیل قائانی، فەرماندەی سوپای پاسداران بووبێت، بەڵکو لە “باڵاترین دەسەڵاتی ئێرانەوە فەرمانەکە دەرچووە”، کە ئاماژەیە بۆ عەلی خامنەیی، ڕێبەری باڵای ئێران.

 

زانیاریی زیاتر: دوای ڕاگرتنی هێرشەکان، ڕۆژانە پێداچوونەوە و هەڵسەنگاندن بۆ دۆخەکە دەکرێت، بەو مانایەی یان ئاگربەستەکە بەردەوام دەبێت یان هێرشەکان دەستپێدەکەنەوە.