بڕیاری بەهەمیشەییکردنی فەرمانبەرانی گرێبەست جێبەجێ دەکرێت

ئاڤا نیوز

دوای ڕەزامەندی ئەنجوومەنی وەزیران، نووسراوی بەهەمیشەییکردنی فەرمانبەرانی گرێبەست ڕەوانەی وەزارەتی دارایی و  ئەنجوومەنی ڕاژە دەکرێت،  بۆ ئەوەی کاری پێویستی لەسەر بکەن و جێبەجێی بکەن. 

وێنە گەورەکە: ئەنجوومەنی وەزیران داوا لە وەزارەتی دارایی و ئەنجوومەنی ڕاژە دەکات بەزووترین کات گشتاندن بۆ مەرج و پێدوایستی و پێوەر و ڕێکارە یاسایییەکانی بەهەمیشەییکردنی فەرمانبەرانی گرێبەست لە سەرجەم وەزارەت و دامودەزگاکان بکەن.

نووسراوی فەرمی:  ئەنجوومەنی وەزیرانی هەرێمی کوردستان لە نووسراوێکی نوێدا کە بەرواری 22-10-2024ی لەسەرە، داوای لە وەزارەتی دارایی و ئابووریی و ئەنجوومەنی گشتیی ڕاژە کردووە بڕیاری ژمارە (246)ـی ئەنجوومەنی وەزیران کە لە ڕێکەوتی 25-09-2024 دەرکراوە، جێبەجێ بکەن و کاری پێویست بکەن بۆ هەرچی زوو گشتاندنی مەرج و پێدوایستی و پێوەر و ڕێکارە یاسایییەکانی بەهەمیشەییکردنی فەرمانبەرانی گرێبەست.

ئەوەی پێویستە بیزانیت: لە هەرێمی كوردستان زیاتر لە 31 هەزار فەرمانبەرانی گرێبەست هەیە و 7%ی كۆی گشتیی مووچەخۆرانی شارستانی پێكدێنن، بەپێی بڕوانامە و جۆری كاركردنیان بڕی مووچەیان دیاریكراوە، دوای بەهەمیشەییکردنیان مووچەی سەرجەمیان زیاد دەبێت، بەهەمیشەییکردنیان لەسەر میلاکی وەزارەت و لایەنەکانی نەبەستراو بە وەزارەت لە هەرێمی کوردستان دەبێت.