کۆمیسیۆن پێداچوونەوە بە 189 سکاڵای پەیوەست بە هەڵبژاردن دەکات

ئاڤا نیوز

کۆمیسیۆنی هەڵبژاردنەکانی عێراق لەڕێگەی پێکهێنانی سێ لیژنەوە پێداچوونە بە جۆر و ناوەڕۆکی ئەو سکاڵایانە دەکات کە لەسەر هەڵبژاردنی خولی شەشەمی پەرلەمانی کوردستان تۆمارکراون و پۆلێنیان دەکات.

وێنە گەورەکە: لیژنەکانی کۆمیسیۆن بەسەر هەر چوار بازنەی هەڵبژاردن دابەش بوون، لیژنەیەک بۆ سلێمانی و هەڵەبجە، لیژنەیەک بۆ هەولێر و لیژنەیەک بۆ دهۆک، لە قۆناغی یەکەم بە قردێلەی زەرد، سەوز  و سوور سکاڵاکان پۆلێن دەکرێن.

ئەوەی پێویستە بیزانیت: لە پڕۆسەی دەنگدانی تایبەت 71 سکاڵا و لە دەنگدانی گشتیی 118 سکاڵا لەسەر پڕۆسەکە تۆمارکراون و بەسەر سێ ڕەنگ پۆلێن دەکرێن:

یەکەم: ئەو سکاڵایانەی قردێلەی زەردیان لێدەدرێت هیچ کاریگەرییەکیان لەسەر ئەنجامی هەڵبژاردن نابێت، ئەو جۆرە سکاڵایانە کەموکوڕییان هەیە بۆیە ڕەنگی زەردیان لێدەدرێت.

دووەم: سکاڵای سەوز ئەمەشیان کاریگەری لەسەر ئەنجامی هەڵبژاردن نابێت، سکاڵاکە لەسەر شێوازی هەڵسوکەوتی کارمەندانی کۆمیسیۆن و کارمەندانی هێزە ئەمنییەکان تۆمارکراوە.

سێیەم: سکاڵای سوور، ئەم سکاڵایە کاریگەری لەسەر ئەنجامی هەڵبژاردن دەبێت و پەیوەستە بە ساختەکاری، ئەگەر لە لێکۆڵینەوەکاندا کۆمیسیۆن بۆی دەرکەوت کە ساختەکاری لە وێستگەیەک کراوە، ئەنجامی ئەو وێستگەیە ڕەت دەکاتەوە.

گۆشەیەکی دیکە: 26 وێستگە لە هەرێمی کوردستان ماون کە داتاکانیان بگەڕێنرێتەوە کۆمیسیۆن، دوێنێ سێشەممە ئەوانەی دهۆک نێردراون، ئەمڕۆ سلێمانی و هەڵەبجە و سبەی پێنجشەممە وێستگەکانی هەولێر ڕەوانە دەکرێن.