یاداشتنامەیەک لەنێوان هەرێمی کوردستان و سعودیە واژۆ دەکرێت

ئاڤا نیوز

 

یاداشتنامەیەکی لێکتێگەیشتن لە نێوان ئەنجوومەنی باڵای كوردستان بۆ پسپۆڕییە پزیشكییەكان و ئەمینداری گشتیی دەستەی سعودیە بۆ پسپۆڕیە تەندروستیەکان واژۆ کرا.

 

چیرۆکی سەرەکی: ڕۆژی سێشەمە 23-10-2024 ياداشتنامەکە لە نێوان هەردوو لایەن بۆ ئاڵوگۆڕی زانیاریی، شارەزایی و پەرەپێدانی خوێندنی بەردەوام کە یارمەتیدەرە بۆ بەرەوپێشبردنی ئاستی چاودێریی تەندروستیی لە ڕیازی پایتەختی سعودیە واژۆ کرا.

 

لێدوانی فەرمی: د.ئاریانا خاڵس بەرزنجی، سەرۆكی ئەنجومەنی باڵای كوردستان بۆ پسپۆڕییە پزیشكییەكان بە ئاڤا نیوزی ڕاگەیاند: بە شێوازێکی فەرمی بۆ پێشانگای تەندروستیی جیهانیی (Global Health) بانگهێشتکرابووین، هاوکات واژۆکردنی ئەم یاداشتنامەیەش لەو چوارچێوەی ئەم سەردانەوە دێت.

 

بۆچی گرنگە: یاداشتنامەکە هەنگاوێکی گرنگە بۆ پەرەپێدانی هەماهەنگی و ئاڵوگۆڕی ئەزموون لە نێوان هەردوو ئەنجومەنەکە، هاوکات ئامانج لە واژۆکردنی ئەم یاداشتنامەیە پاڵپشتیکردنی خوێندنی پزیشکیی، ڕاهێنانی پیشەیی و ڕەخساندنی دەرفەتی زیاترە بۆ پەرەپێدانی کارمەندانی پزیشکیی و تەندروستیی لەنێوان هەردوولا.

 

گۆشەیەکی دیکەی دیمەنەکە: ئەم هەماهەنگیە لە چوارچێوەی پابەندبوونی هەردوو ئەنجومەنەکە بۆ باشترکردنی کوالێتی خزمەتگوزاریی تەندروستیی دێت، لە ڕێگەی ئاڵوگۆڕیی زانیاریی و شارەزایی و پەرەپێدانی خوێندنی بەردەوام کە یارمەتیدەرە بۆ بەرەوپێشبردنی ئاستی چاودێریی تەندروستی لە ناوچەکەدا.