پەیوەندیی خۆشەویستی ئەرێنی فشاری دەروونی کەمدەکاتەوە

ئاڤا نیوز

 

وێنە گەورەکە: لە توێژینەوەیەکی نوێدا کە لەلایەن زانکۆی کالیفۆرنیا "دەیڤیس" ئەنجامدراوە، دەرکەوتووە، هەبوونی خۆشەویستییەکی ئەرێنی و دڵخۆش، ورەی مرۆڤەکان بەرز دەکاتەوە و یارمەتیدەر دەبێت بۆ کەمکردنەوەی فشاری دەروونی، بەتایبەتی لە پیریدا.

 

ژمارەکان وادەڵێن: توێژینەوەکە لەسەر 321 کەسی پێگەیشتوو کراوە کە تەمەنیان لە نێوان 56 بۆ 87 ساڵیدایە و داتاکان لە 3 توێژینەوەدا لە کەنەدا و ئەڵمانیا لە نێوان ساڵانی 2012 بۆ 2018 کۆکراونەتەوە، تاقیکردنەوەکە بۆ ئەو بارە سۆزدارییانە ئەنجامدراوە کە ڕازیبوون لە پەیوەندییەکانییان و ئاستی کۆرتیزۆڵییان لە ڕێگەی لیکەوە پێوانە کراوە.

 

لێدوانی فەرمی: تۆمیکۆ یۆنێدا، یاریدەدەری پرۆفیسۆری دەروونناسی و نووسەری سەرەکی توێژینەوەکە دەڵێت: هەست و سۆزە ئەرێنییەکان دەتوانن توانای مامەڵەکردنمان بگۆڕن بۆ شێوەیەکی نەرم و نیان.

 

ئەوەی پێویستە بیزانیت: ئاستی کۆرتیزۆڵ بەشێکی سەرەکییە لە وەڵامدانەوەی جەستە بۆ فشار، ئەنجامی تاقیکردنەوەکە دەریخستووە ڕێژەی کۆرتیزۆڵ کەمتر بووە کاتێک هاوبەشەکان دڵخۆش بوون و ڕازیبوون لە پەیوەندییەکانییان.

 

لەلایەکی دیکەوە: توێژینەوەکانی پێشووتریش دەریانخستووە کە هەستە نەرێنییەکان پەیوەندییان بە بەرزبوونەوەی ئاستی کۆرتیزۆڵەوە هەیە، ئەمەش ڕەنگە ببێتە هۆی خراپی تەندروستی.