زانیاری نوێ لەبارەی هێرشی ئیسرائیل بۆ سەر ئێران ئاشکرا دەکرێت

ئاڤا نیوز

 

ئیسرائیل بەر لە هێرشەکەی بۆ سەر ئێران، ڕۆژی هەینی هۆشداریی بە ئێران دابوو کە هێرشیان دەکاتە سەر و نابێت تاران هێرشی تۆڵەسەندنەوەی دیکە بکات. 

 

وێنە گەورەکە: ئیسرائیل بەرەبەیانی ڕۆژی شەممە 26-10-2024، هێرشی ئاسمانی کردە سەر چەند دامەزراوەیەکی سەربازی و مووشەکی ئێران، چەند سیستمێکی بەرگریی و بنکەی مووشەکی ئێران لەناوچوون و چوار سەربازیش کوژران. 

 

زانیاریی بەدەستهاتوو: سێ بەرپرسی ئاگادار لە هێرشەکە بە پێگەی ئەکسیۆسی ئەمریکییان ڕاگەیاندووە: هێرشەکە لە سێ قۆناغ پێکهاتبوو، یەکەم شەپۆڵی هێرشەکان بۆ سەر سیستمی بەرگریی هەوایی ئێران بوو، دوو شەپۆڵی دیکەی هێرشەکەش بۆ سەر بنکەکانی هاوێشتنی مووشەک و فڕۆکەی بێفڕۆکەوانی سوپای ئێران بوو. 

 

زانیاریی زیاتر: ئیسرائیل پێش هێرشەکە لە ڕێگەی لایەنی سێیەمەوە (کاسپەر ڤێلدکەمپ، وەزیری دەرەوەی هۆڵەندا) پەیامێکی ئاراستەی ئێران کرد و ئەو وڵاتەی لەو شوێنانەی هێرشیان دەکاتە سەری ئاگادار کردبوو، لە هەمانکاتدا هۆشداری دابوو بە ئێران کە هێرشی تۆڵە سەندنەوە نەکات، چونکە هێرشی دواتری ئیسرائیل زۆر توند و بە ئازار دەبێت، بەتایبەت ئەگەر هاووڵاتییانی ئیسرائیلی بکوژرێن یان بریندار ببن".

 

لەلایەکی دیکەوە: عەباس عێراقچی، وەزیری دەرەوەی ئێران دووپاتی کردەوە، ڕۆژێک پێش هێرشەکەی ئیسرائیل هۆشدارییەکی لەو بارەیەوە وەرگرتووە.