وەزارەتی دارایی لەبارەی دروستکردنی ئاستەنگ بۆ 'هەژماری من' هۆشداریی دەدات

ئاڤا  نیوز 

بەپێی نوسراوێک کە واژووی ئاوات شێخ جەناب، وەزیری دارایی حکومەتی هەرێمی کوردستان لەسەرە و دەست ئاڤا میدیا کەوتووە، داوای سزادانی ئەو کەسانە دەکات کە ڕێگری لە کارەکانی تیمی هەژماری من دەکەن. 

 

وێنە گەورەکە: لەماوەی بانگەشەی هەڵبژاردن بافڵ تاڵەبانی، سەرۆکی یەکێتیی نیشتمانیی کوردستان چەند جارێک هێرشیکردە سەر پرۆژەی هەژماری من و داوای لە فەرمانبەران دەکرد ناوی خۆیان لە پرۆژەکە تۆمار نەکەن، دواتر میدیاکانی یەکێتی بڵاویان کردەوە، سەرجەم نووسینگە و بنكەكانی پڕۆژەی هەژماری من لە سلێمانی داخراون، ئەمەش کاردانەوەی بەدوای خۆیدا هێنا و وەزیری دارایی حکومەتی هەرێمی کوردستان هۆشداریی دەداتە بانکە بازرگانییەکانی سنووری پارێزگاکانی سلێمانی و هەڵەبجە.

 

ڕاگەیێنراوی فەرمی: بەگوێرەی نووسراوێک کە واژووی ئاوات شێخ جەناب، وەزیری دارایی حکومەتی هەرێمی کوردستانی لەسەرە بۆ بەڕێوبەرایەتیی گشتیی بانکە بازرگانییەکان/بانکەکانی مەڵکەندی و تووی مەلیک و تانجەڕۆ، هەڵەبجە، چەمچەماڵ نێردراوە، ئاماژە بەوە دەکات کە هەژماری من پرۆژەیەکی سەرتاسەریی حکومەتی هەرێمی کوردستانە و لەلایەن سەرۆکایەتیی ئەنجوومەنی وەزیرانەوە پەسەند کراوە.

 

زانیاریی زیاتر: لە نووسراوەکەدا هاتووە پێویستە پرۆژەی هەژماری من، وەک خۆی لە سەرجەم پارێزگاکانی هەرێمی کوردستان جێبەجێ بکرێت، هاوکات هەر بەڕێوەبەر و فەرمانبەرێک لەو بانکانە کە تایبەتکراون بۆ جێبەجێکردنی پرۆژەکە، ڕێگریی و ئاستەنگ بۆ کارمەندانی هەژماری من دروست بکات، دووچاری لێپرسینەوە دەبێت.

 

لەلایەکی دیکەوە: ڕۆژی دووشەممە 2024/10/28, د.ئومێد سەباح، سەرۆكی دیوانی ئەنجوومەنی وەزیرانی هەرێمی كوردستان لە كۆنفڕانسێكی ڕۆژنامەوانیدا ڕایگەیاند: هەژماری من پڕۆژەیەكی یاساییە، لە كۆبوونەوەی ئەنجوومەنی وەزیران هەموو ئەندامان دەنگیان لەسەر داوە، بەپێی یاسا وەزارەتی دارایی تاكە لایەنە بۆ دیاریكردنی شێوازی دابەشكردنی مووچە.