هەولێر لەبارەی پلەبەرزکردنەوەی فەرمانبەران لەگەڵ بەغدا دەست بە گفتوگۆ دەکات

ئاڤا نیوز

شاندێکی باڵای هەرێمی کوردستان لە بەغدایە و یەکێک لەو پرسانەی لەگەڵ وەزارەتی دارایی عێراق گفتوگۆی لەسەر دەکەن پلەبەرزکردنەوەی فەرمانبەرانە، کە لە مانگی دووی ئەمساڵەوە لیست ئامادەکراوە و بەغدا ئامادەنییە تەرخانی دارایی بۆ بکات.

وێنە گەورەکە: حکومەتی هەرێمی کوردستان کار لەسەر هاوتاکردنی سەرجەم ماف و شایستەکانی مووچەخۆران لەگەڵ حکومەتی عێراق دەکات، پلەبەرزکردنەوەی فەرمانبەران یەکێکە لە هەنگاوەکان و دوای هەشت ساڵ دەستپێدەکاتەوە.

بۆچی گرنگە: زیاتر لە 500 هەزار مووچەخۆر لە پرۆسەکە سوودمەند دەبن، هەر فەرمانبەرێک پلەیەک یان دوو پلە بەرزدەکرێتەوە و (25 بۆ 125 هەزار دینار) بۆ مووچە بنەڕەتییەکەیان زیاد دەبێت.

لێدوانی ڕۆژنامەوانی: ڕێباز حەملان، ڕاوێژکاری سەرۆکی حکومەت بۆ کاروباری دارایی ڕایگەیاند: "شاندی هەرێمی کوردستان لەگەڵ بەغدا پرسی دەستپێکردنەوەی پلەبەرزکردنەوەی فەرمانبەران تاوتوێ دەکەن، بەو ئامانجەی بەزووترین کات دەستپێبکاتەوە."

باکگراوند: بەهۆی قەیرانی دارایی و نەناردنی بەشە بودجەی هەرێمی كوردستان لەلایەن حكومەتی عێراق، لە ساڵی 2016ـەوە پلەبەرزكردنەوەی فەرمانبەران ڕاگیراوە، دەستپێکردنەوەی پێویستی بە دانوستانی نێوان هەولێر و بەغدایە.