مەندەلاوی داوای یەکلاییکردنەوەی پۆستی سەرۆکی پەرلەمانی عێراق دەکات

ئاڤا نیوز

سەرۆکی پەرلەمانی عێراق بە وەکالەت داوا لە هەموو فراکسیۆنەکان دەکات ئامادەیی دانیشتنی تایبەت بە هەڵبژاردنی سەرۆکی پەرلەمان بن و دەڵێت، ئەو پۆستە پشکی هاوبەشێکی سەرەکییە لە پرۆسەی سیاسی وڵاتدا و پێویستە ڕادەستیان بکرێتەوە.

 

وێنە گەورەکە: نزیکەی ساڵێک بەسەر بڕیاری دوورخستنەوەی محەممەد حەلبووسی، لە پۆستی سەرۆکی پەرلەمان تێدەپەڕێت، لەسەر داوای چوارچێوەی هەماهەنگی شیعەکانیش بڕیارە ئەمڕۆ دانیشتنی پەرلەمانی عێراق بۆ هەڵبژاردنی سەرۆکی نوێی پەرلەمان ئەنجام بدرێت.

 

ڕاگەیێنراوی فەرمی: موحسین مەندەلاوی، سەرۆکی پەرلەمانی عێراق بە وەکالەت لە پەیامێکدا دەڵێت، داوا لە نوێنەرانی گەل دەکەم کە بە شێوەیەکی چالاکانە ئامادەیی کۆبوونەوەی تایبەت بە هەڵبژاردنی سەرۆکی دەسەڵاتی یاسادانان بن، کە پشکی هاوبەشێکی سەرەکییە لە پرۆسەی سیاسی وڵاتدا، داواش لە هێزە سیاسییەکان دەکات کە بەرپرسیارێتی نیشتمانی خۆیان بۆ تەواوکردنی شایستە دەستوورییەکان جێبەجێ بکەن.