مەحموود مەشهەدانی بە سەرۆکی پەرلەمانی عێراق هەڵبژێردرا

ئاڤا نیوز

دوای 15 ساڵ لە دوورخستنەوەی وەکو سەرۆکی پەرلەمانی عێراق، مەحموود مەشهەدانی ئەمشەو جارێکی دیکە بە سەرۆکی پەرلەمان هەڵبژێردرا.

چیرۆکی سەرەکی: دوای نزیکەی ساڵێک لە دوورخستنەوەی محەممەد حەلبووسی و کێشمەکێشی زۆری نێوان لایەنە سوننەکان، ئێوارەی ئەمڕۆ بە بەشداریی 271 پەرلەمانتار دانیشتنی پەرلەمانی  عێراق بۆ هەڵبژاردنی سەرۆکی نوێ بەڕێوەچوو، چوار کاندید (سالم عیساوی، مەحموود مەشهەدانی، عامر عەبدولجەبار و تەڵاڵ زەوبەعی) کێبڕکێیان لەسەر پۆستەکە دەکرد، بەڵام هیچ کاندیدێک دەنگی پێویستی نەهێنا کە 166 دەنگ بوو.

زانیاریی زیاتر: دەنگدان کەوتە گەڕی دووەم و کێبڕكێ لە نێوان مەحموود مەشهەدانی و سالم عیساوی بوو، کە لە گەڕی یەکەم 153 دەنگ و 95 دەنگیان هێنابوو. لە گەڕی دووەم مەشهەدانی سەرکەوت و 181 دەنگی بەدەستهێنا.

مەشهەدانی کێیە:

- لە ساڵی 1948 لەدایک بووە و یەکێکە لە سەرکردە دیارەکانی سوننە.

- لە ساڵی 1972 کۆلێژی پزیشکی تەواو کردووە.

- ساڵی 1990 لە سەردەمی ڕژێمی سەددام حوسێن دەستگیر کرا، ساڵی 2003 پێش ڕووخانی ڕژێم بە لێبوردنی گشتی ئازادکرا.

-  لەدوای ساڵی 2003 بەشداری پرۆسەی سیاسی کردووە. 

- لە ساڵی 2004 ئەندامی لیژنەی نووسینەوەی دەستووری عێراق بووە.

 - دامەزرێنەری بەرەی دیالۆگی نیشتمانی بووە لە ساڵی 2004.

- لە ساڵی 2006  وەک سەرۆکی پەرلەمانی عێراق هەڵبژێردرا لە پشکی پێکهاتەی سوننە و بووە یەکەم سەرۆکی پەرلەمان دوای ڕووخانی حکومەتی بەعس.

- لە 17ی کانوونی یەکەمی 2008 بە هۆی ناڕەزایی زۆربەی پەرلەمانتاران لە دژی خراپ بەڕێوەبردنەکەی، دەستلەکارکێشانەوەی خۆی لە پۆستەکەی ڕاگەیاند.

- لە هەڵبژاردنی ساڵی 2021ی پەرلەمانی عێراق وەک نوێنەری پارێزگاری بەغدا لە چوارچێوەی هاوپەیمانی عەزم هەڵبژێردرا و بووە پەرلەمانتار.

- سەرۆکی مەکتەبی سیاسیی ڕێکخراوی دەعوە و ئیرشاد بووە.

- ئەمساڵ لەلایەن هاوپەیمانی تەقەدووم بۆ پۆستی سەرۆکی پەرلەمان کاندید کرا و ئەمڕۆ بۆ جاری دووەم بووەوە بە سەرۆکی پەرلەمان.