سەرەڕای پشوو؛ ئەمڕۆ و سبەی پرۆسەی بایۆمەتریی مووچە بەردەوام دەبێت

ئاڤا نیوز

 

هەرچەندە ئەمڕۆ و سبەی پشووی فەرمانگە حكومییەكانە، بەڵام لە بانكەكان دەوام دەكرێت و پرۆسەی بایۆمەتریی مووچە بۆ ئەو مووچەخۆرانە دەكرێت كە بایۆمەترییان نەكردووە.

 

ڕاگەیێنراوی فەرمی: قایمەقامییەتی چەمچەماڵ ڕایگەیاند: هەردوو بانكی چەرموو و چەمچەماڵ ئەمڕۆ و سبەی 1 و 2 -11-2024، دەوام دەكەن و بایۆمەتریی بۆ مووچەخۆران دەكەن.

 

زانیاریی زیاتر: قایمەقامییەتی چەمچەماڵ ئاگاداری سەرجەم مووچەخۆرانی سنوورەكە (فەرمانبەران - خانەنشین - کەسوکاری شەهیدان و ئەنفالکراوان- زیندانیانی سیاسی) دەكاتەوە، هەر كەسێك بایۆمەتری و یوپیئێنی نەكردبێت، سەردانی هەردوو بانكەكە بكات و بایۆمەتریی مووچە بكات.

 

ئەمەش بزانە: ڕۆژی 27-10-2024، بەڕێوەبەرایەتی گشتیی ژمێرکاری لە وەزارەتی دارایی و ئابووری حکومەتی هەرێمی کوردستان لە ڕاگەیێنراوێکدا سەرجەم مووچەخۆرانی ئاگادار كردەوە تا 2024/11/20 پێویستە تۆماری بایۆمەتری و UPNـیان هەبێت، بە پێچەوانەوە حکومەتی عێراق مووچەکانیان ڕادەگرێت.

 

ئەوەی پێویستە بیزانیت: بڕیاری خۆتۆمارکردن لە سیستەمی بایۆمەتری هەموو ئەو فەرمانبەر و مووچەخۆرانەش دەگرێتەوە کە بە هۆکاری جیاواز لە دەرەوەی وڵاتن یان مۆڵەتی بێ مووچە و خوێندنیان هەیە.