سوودانی و ئەردۆغان پێشهاتەکانی ناوچەکە تاوتوێ دەکەن

ئاڤا نیوز

سەرۆکی حکومەتی عێراق و سەرۆککۆماری تورکیا لە ئیستانبوڵ کۆبوونەوە و تاوتوێی جەنگی غەززە و لوبنان و بارودۆخی ئاشتی و ئاسایشی ناوچەکەیان کرد، هەردوولا جەختیان لە پێویستیی ڕاگرتنی جەنگ و گرژییەکان و گەیاندنی هاوکاریی مرۆیی بۆ لێقەوماوان کردەوە.

 

وێنە گەورەکە: محەممەد شیاع سوودانی، سەرۆکوەزیرانی عێراق ئەمڕۆ هەینی بە سەردانێکی ڕانەگەیێنراو گەیشتە شاری ئیستانبوڵ و لە کۆشکی وەحیدەین لەگەڵ ڕەجەب تەیب ئەردۆغان، سەرۆککۆماری تورکیا کۆبووەوە.

 

ڕاگەیێنراوی فەرمی: نووسینگەی میدیایی سەرۆکوەزیرانی عێراق ڕایگەیاند: سوودانی و ئەردۆغان پرسی یەکخستنی هەڵوێستەکانیان بەرامبەر ئەو پێشهاتە مەترسیدارانەی بەرۆکی ناوچەوکەیان گرتووە تاوتوێ کرد، هاوکات هانی وڵاتانی عەرەبی و ئیسلامی و ڕێکخراوە نێودەوڵەتی و هەرێمییەکان دەدەن پاڵپشتی هەوڵەکانی ئاگربەست بن، هاوکات ئاسانکاریی بۆ گەیاندنی هاوکاریی مرۆیی بۆ خەڵکی لێقەوماو لە ناوچەکانی جەنگ بکەن.

 

زانیاریی زیاتر: لە کۆبوونەوەکەدا پەیوەندیی دوو قۆڵی و لێکتێگەیشتن و ڕێکەوتنی هاوبەش لە هەموو بوارەکانی ئابووری و گەشەپێدان تاوتوێ کران.