لیژنەیەک بۆ لێکۆڵینەوە لە دامەزراندنی وانەبێژان پێکدەهێنرێت

ئاڤا نیوز

دوای ئاشکرابوونی گەندەڵی لە دامەزارندنی وانەبێژان لە زانکۆی ڕاپەڕین، وەزارەتی خوێندنی باڵا و توێژینەوەی زانستی لیژنەیەک بۆ لێکۆڵینەوە و وردبینیکردن لە ناوی سەرجەم وانەبێژانی دامەزراو لە زانکۆ و پەیمانگەکان پێکدەهێنێت.

وێنە گەورەکە: حکومەتی هەرێمی کوردستان ئەمساڵ هاوشێوەی وانەبێژانی وەزارەتی پەروەردە، بڕیاری دامەزراندنی بۆ وانەبێژانی زانکۆ و پەیمانگەکان دەرکرد و ڕێکەوتی 2-10-2024 ناوی چوار هەزار و 104 کەس گەڕایەوە، بەڵام ئێستا ئاشکرابووە بەتایبەت لە سنووری سلێمانی و دەوروبەری لەلایەن بەرپرسانی یەکێتی گەندەڵییەکی زۆر لەم  پرۆسەیەدا کراوە.

لێدوان فەرمی: د. توانا نەجەف، بەڕێوەبەری گشتیی کارگێڕی و دارایی لە وەزارەتی خوێندنی باڵا و توێژینەوەی زانستیی هەرێمی کوردستان بە ئاڤا نیوزی ڕاگەیاند: بۆ پشتڕاستکردنەوەی شیاوبوونی هەموو ئەو کەسانەی وەکو وانەبێژ بە گرێبەست دامەزراون، لیژنەیەک پێکهێنراوە و لە کەلار و کفرییەوە تاوەکو زاخۆ بێ جیاوازی لێکۆڵینەوە لە دۆسیەی هەموویان دەکرێت.

لەلایەکی دیکەوە: مەرد عەلی خاڵە، کاندیدی دەرچووی پارتی بۆ پەرلەمانی کوردستان لە پارێزگای سلێمانی بە ئاڤا نیوزی ڕاگەیاند: "دەبێت وانەبێژانی شایستە لە کەسانی ناشایستە جیابکرێنەوە، لە نووسینگەی سەرۆکوەزیران مەسرور بارزانی و دیوانی ئەنجوومەنی وەزیران بەدواداچوونمان بۆ پرسەکە کردووە و داوای هەڵوەشاندنەوەی دەکەین".

باکگراوند: ئەمڕۆ دووشەممە ئاشکرا کرا لە کۆی 395 وانەبێژی دامەزراو لە زانکۆی ڕاپەڕین، 248 یان بە نایاسایی و بە تەزکیەی حیزبی لەلایەن بەرپرسانی یەکێتی دامەزراون، تەنانەت بەشێکیان هیچ پەیوەندییەکیان بە زانکۆکەوە نەبووە، بەڵکو کەسوکاری بەرپرسان بوون، ئەمەش نارەزایەتی و خۆپێشاندانی لێکەوتەوە.