سەرۆکوەزیران بارزانی: دەبێت حکومەت بەپێی بەرکەوتەی هەڵبژاردن پێکبهێنرێت

ئاڤا نیوز

سەرۆکوەزیران مەسرور بارزانی پێشوازی لە باڵیۆزی ئەمریکا لە عێراق کرد و هەردوولا جەختیان لە ئامادەکارییەکان بۆ پێکهێنانی کابینەی نوێی حکومەتی هەرێمی کوردستان کرد.

 

چیرۆکی سەرەکی: ئه‌مڕۆ دووشەممە‌ سەرۆکوەزیران مەسرور بارزانى لەگەڵ ئەلینا ڕۆمەناوسکی، باڵيۆزى ئه‌مه‌ريكا له‌ عێراق کۆبووەوە و تەوەری سەرەکیی گفتوگۆکان تایبەت بوو بە ڕێکار و ئامادەکارییەکانی پێکهێنانی کابینەی نوێی حکومەتی هەرێمی کوردستان.

 

ڕاگەیێنراوی فەرمی: هەردوولا هاوڕابوون لەسەر گرنگیی لەیەکتێگەیشتنی لایەنە سیاسییەکان بۆ پێکهێنانی کابینەی نوێ لە زووترین کاتدا، بۆ ئەوەی درێژە بە کار و پرۆژە خزمەتگوازارییەکانی بدات و خزمەتی گشت هاووڵاتی و پێکهاتەکانی هەرێمی کوردستان بکات.

لێدوانی فەرمی: سەرۆکوەزیران مەسرور بارزانى جەختی کردووەتەوە، پێویستە پێکهێنانی حکومەت لەسەر بنەمای دەنگی لایەنە سیاسییەکان و بەرکەوتەی هەڵبژاردن بێت و حکومەتێکی سەرتاسەری و بەهێز و یەکگرتوو بێت.

 

ئەمەش بزانە: لە بەشێکی دیکەی کۆبوونەوەکەدا، بیروڕا لەبارەی شەڕ و ئاڵۆزییەکانی ڕۆژهەڵاتی ناوەڕاست ئاڵوگۆڕ کرا. هەردوولا هاوڕابوون لەسەر پاراستنی ئاسایش و سەقامگیریی ناوچەکە و دوورخستنەوەی لێکەوتەکانی ئەو شەڕ و ئاڵۆزییە لەسەر عێراق و هەرێمی کوردستان.