ترەمپ دڵنیایی بە زێلینیسکی دەدات

ئاڤا نیوز

 

دوای سەرکەوتنی دۆناڵد ترەمپ، کاندیدی کۆمارییەکان لە هەڵبژاردنی سەرۆکایەتیی ئەمریکا، ڤۆلۆدیمێر زێلینسکی، سەرۆکی ئۆکراینا لە پەیوەندییەکی تەلەفۆنیدا پیرۆزبایی لە ترەمپ دەکات.

 

بۆچی گرنگە: بە گوێرەی ئاژانسی ئاکسیۆسی ئەمریکی گفتوگۆکەی نێوان سەرۆکی هەڵبژێردراوی ئەمریکا و سەرۆکی ئۆکراینا 25 خولەکی خایاندووە، ئیلۆن مەسک، گەورە ملیاردێری ئەمریکی تیایدا بەشدار بووە و زێلینسکی بە بۆچوونەکانی ترەمپ خۆشحاڵ بووە و سەبارەت بە هەنگاوەکانی داهاتووی ئەمریکا پەیوەست بە شەڕی ڕووسیا و ئۆکراینا دڵنیا بووەتەوە.

 

زانیاریی بەدەستهاتوو: زێلینسکی پەیوەندییە تەلەفۆنییەکەی بە "پەیوەندییەکی نایاب" وەسف کردووە. سەرەڕای نیگەرانییەکان سەبارەت بە ئەگەری ئەوەی ترەمپ یارمەتییەکانی ئەمریکا بۆ ئۆکراینا بوەستێنێت، بەڵام ئۆکراینییەکان لە گفتوگۆکانیان لەگەل تیمی ترەمپ و ڕاوێژکارەکانی، خۆشحاڵ و دڵنیان.

 

زانیاریی زیاتر: هاوکات ترەمپ لە پەیوەندییە تەلەفۆنییەکەدا، بە بێ خستنەڕووی وردەکاریی زیاتر بە زێلینسکی ڕاگەیاندووە، "ئەمریکا پشتیوانی لە ئۆکراینا دەکات". ئەمە بووەتە هۆی ئەوەی زێلینسکی هەست بە نائومێدیی و نیگەرانیی زیاتر نەکات. 

 

باکگراوند: ڕێککەوتی 2024/ 11/5 هەڵبژاردنی سەرۆکایەتیی ئەمریکا بەڕێوەچوو و تیایدا دۆناڵد ترەمپ، توانی بە بەدەستهێنانی 301 ئەندامی دەستەی هەڵبژاردن ببێتە 47ـین سەرۆکی ئەمریکا لەبەرامبەر 226 ئەندامی دەستەی هەڵبژاردنی کامالا هاریس.