جەمیل بایک لەبارەی پرۆسەی ئاشتی: ئۆجەلان هەر بڕیارێک بدات پێیەوە پابەند دەبین

ئاڤا نیوز

هاوسەرۆکی کەجەکە لەبارەی دەستپێکردنی پرۆسەیەکی نوێی ئاشتی لە باکووری کوردستان و تورکیا دەڵێت، نوێنەری ئەوان ئۆجەلانە و ئەو کەسەیە موخاتەبی چارەسەری پرسی کورد دەکات.

 

وێنە گەورەکە: دوای دەستپێشخەرییەکەی دەوڵەت باخچەلی، سەرۆکی پارتی نەتەوەیی تورکیا (مەهەپە) لە مانگی ڕابردوودا بۆ دەستپێکردنەوەی پرۆسەیەکی نوێی ئاشتی و چارەسەری پرسی کورد لە توکیا و باکووری کوردستان، ئەم پرسە قسەی جیاوازی لەبارەوە دەکرێت، یەکێک لە کارەکتەرەکانیش لەم پرسە پەکەکەیە.

لێدوانی فەرمی: جەمیل بایک، هاوسەرۆکی کۆما جڤاکێن کوردستان (کەجەکە) لە چاوپێکەوتنێکی میدیاییدا بۆچوونی خۆی سەبارەت بەم پرسە دەخاتەڕوو و دەڵێت، ئەگەر تورکیا دەیەوێ پرسی کورد چارەسەر بکات، دەبێت سەرەتا لە هەڵگرتنی گۆشەگیری سەر ئۆجەلان دەستپێبکات.

 

جەمیل بایک پێیوایە "ئەگەر تورکیا بیەوێ پرۆسەی ئاشتی بچەسپێنێت، نابێت درێژە بە گۆشەگیری  سەر ئۆجەلان بدرێت، بەڵام پێناچێت تورکیا ئامانجێکی بۆ چارەسەر هەبێت، ئەگەر وابووایە سزای دیسیپلینی نوێیان بۆ ئۆجەلان نەدەبڕیەوە". جەختیش دەکاتەوە کە گرفتێک هەیە و بەرپرسانی تورکیا و قسە و کرداریان وەکو یەک نییە.

 

باکگراوند: ڕۆژی 23ی مانگی ڕابردوو  دوای 43 مانگ عومەر ئۆجەلان، برازای عەبدوڵڵا ئۆجەلان سەردانی ئیمرالی کرد و چاوی بە  ئۆجەلانی مامی کەوت. ئۆجەلان بە برازاکەیدا پەیامێکی نارد و وتی: "ئەگەر هەلومەرجەکان بڕەخسێنرێن دەسەڵاتی تیۆری و پراکتیکیی هەیە ئەم ململانێ تووندوتیژییە بگوازێتەوە بۆ زەمینەی یاسایی و سیاسی.

 

بابەتی ستراتیژی: سه‌بارەت به‌ پشتیوانیكردنى هه‌ر بڕیارێك ئه‌گه‌رهات‌ و ئۆجه‌لان ده‌ریكرد جەمیل بایک دەڵێت: "وەکو چەندینجار دووبارەمان کردووەتەوە، نوێنەری ئێمه لە هەموو بوارێکەوە ئۆجەلانە و ئەو کەسەیە کە موخاتەبی چارەسەری پرسی کورد دەکات".