قەتەر لە نێوەندگیریکردنی نێوان ئیسرائیل و حەماس کشایەوە

ئاڤا نیوز

 

قەتەر ڕۆڵی خۆی وەک نێوەندگیری نێوان ئیسرائیل و حەماس سەبارەت بە ئازادکردنی بارمتەکان و ئاگربەست لە کەرتی غەززە هەڵپەسارد.

 

لێدوای فەرمی: وەزارەتی دەرەوەی قەتەر لە بەیاننامەیەکدا ڕایگەیاند "قەتەر 10 ڕۆژ لەمەوبەر لە میانی دوایەمین هەوڵ بۆ گەیشتن بە ڕێککەوتن، لایەنەکانی لەوە ئاگادار کردووەتەوە کە ئەگەر لەم گەڕەدا ڕێککەوتن نەیەتە ئاراوە، ئەوا هەوڵەکانی خۆی بۆ نێوەندگیریی لە نێوان حەماس و ئیسرائیل دەوەستێنێت."

 

ئەوەی پێشبینی دەکرێت: قەتەر دەڵێت، "هەرکات حەماس و ئیسرائیل ویستی خۆیان بۆ دانوستان نیشان دایەوە، ئەویش دەست بە نێوەندگیری دەکاتەوە".

 

زانیاریی بەدەستهاتوو: ئەم هەواڵە دوای ئەوە دێت کە چەند بەرپرسێکی باڵای ئەمریکی ڕایانگەیاندبوو، دوای ئەوەی حەماس دوایەمین پێشنیازەکانی تایبەت بە ئاگربەستی غەززە و ئازادکردنی بارمتەکانی ڕەتکردەوە، واشنتن چیدیکە ئامادە نییە لەگەڵ بەرپرسانی حەماس لە قەتەر کۆببێتەوە.

 

ئەوەی پێویستە بیزانیت: لەبارەی دەرکردنی بەرپرسانی حەماس لە وڵاتەکەی، وەزارەتی دەرەوەی قەتەر ئاماژە بۆ ئەوە دەکات، "هەواڵەکانی پەیوەست بەوەی کە ئەمریکا داوای لە قەتەر کردبێت حەماس لەو وڵاتە دەر بکات، ورد و درووست نین". بەرپرسانی حەماسیش ڕایانگەیاندووە، هەواڵەکە دروست نییە و هیچ داوایەکی لەو چەشنەیان ئاراستە نەکراوە. 

 

ئەمەش بزانە: ساڵی 2012 و لەسەر داوای باراک ئۆبامای سەرۆکی ئەوکاتی ئەمریکا، حەماس نووسینگەیەکی لە قەتەر کردەوە.