وەفدێکی باڵای ئەمنیی عێراق و هەرێمی کوردستان گەیشتنە تاران

ئاڤا نیوز

 

ڕاوێژکاری ئاسایشی نیشتمانیی عێراق و وەزیری ناوخۆی هەرێمی کوردستان گەیشتنە تارانی پایتەختی ئێران.

 

ڕاگەیێنراوی فەرمی: ئەمڕۆ یەکشەممە 10-11- 2024، قاسم ئەعرەجی، ڕاوێژکاری ئاسایشی نیشتمانیی عێراق و ڕێبەر ئەحمەد، وەزیری ناوخۆی هەرێمی کوردستان و هیوا ئەحمەد، سەرۆكی دەزگاى ئاسايشى هەرێمی کوردستان بە سەردانێکی فەرمی گەیشتنە تارانی پایتەختی ئێران.

 

زانیاریی زیاتر: بەگوێرەی زانیارییەکانی ئاڤا میدیا، سەردانەکەی ڕاوێژکاری ئاسایشی نیشتمانیی عێراق و وەزیری ناوخۆی هەرێمی کوردستان لە چوارچێوەی بەدواداچوون بۆ ڕێککەوتنە ئەمنییەکەی نێوان عێراق و ئێران دێت، هاوکات گفتوگۆکردن لەسەر گۆڕانکارییەکانی ناوچەکە ئامانجێکی دیکەی سەردانەکەیە.

 

ئەوەی پێویستە بیزانیت: بەر لەم سەردانە بۆ تاران، دوێنێ لە بەغداد قاسم ئەعرەجی چاوی بە ڕاوێژكارێكی سەربازی ئێران كەوت بە ناوی لیوا مەجید قلی پور، لە دیدارەکە باسیان لە بابەتی كۆنترۆڵی سنوورەكان و ڕووبەڕووبوونەوەی تیرۆر كردووە، لە میانەی گفتوگۆکەیان ئەعرەجی پێی گوتووە، عێراق دژی ئەوەیە ئاسمانی وڵاتەكەی بۆ هێرشكردنەسەر ئێران بەكاربهێنرێت، کە مەبەستی هێرشەكەی ئەمدواییەی ئیسرائیل بوو بۆسەر ئێران.

 

باکگراوند: ئەمساڵ ساڵی جێبەجێكردنی ڕێككەوتنی ئەمنیی نێوان بەغدا و تاران بوو، هەرێمی کوردستان هاوشانی عێراق پابەندبوونی کرداری بۆ جێبەجێکردنی ڕێککەوتنەکە ناوە، لەو چوارچێوەیەشدا بارەگاکانی حیزبەکانی ڕۆژهەڵاتی کوردستان لە سنوورەکان دوورخراونەتەوە.