سێ شوێن لە پارێزگای سلێمانی بۆ دابەشکردنی زەوی ئامادەکراون

ئاڤا نیوز

 

لە قۆناغی یەکەمی دابەشکردنی زەوی لە سنووری پارێزگای سلێمانی نزیکەی دوو هەزار پارچە زەوی بەسەر فەرمانبەران و خانەنشینان دابەشکرا، ئامادەسازی دەکرێت بۆ ئەوەی لە قۆناغی دووەم نزیکەی شەش هەزار کەس زەوی وەربگرن.

 

وێنە گەورەکە: پرۆسەی دابەشکردنی زەوی بەردەوامی هەیە، لە 10 ڕۆژی داهاتوودا لە سەرجەم پارێزگاکانی هەرێمی کوردستان تیروپشک بۆ هەزاران ناو دەکرێت، لە پارێزگای سلێمانی سەرووی 20 هەزار زەوی جیاکراونەتەوە بۆ ئەوەی زەوییان پێبدرێت.

 

لێدوانی فەرمی: زەردەشت ڕەفیق، گوتەبێژی شارەوانی سلێمانی بە ئاڤا نیوزی گوت، "ناوی فەرمانبەرانی وەزارەتەکانی کارەبا و کار گەڕاوەتەوە  و نزیکەی 6 هەزار کەس تیروپشکی وەرگرتنی زەویان بۆ دەکرێت، لە هەر سێ ناوچەى سوتکە، تانجەڕۆ و تاسڵوجە زەوییەکان دابەشدەکرێن.

 

ئاماژەی بەوەش کرد، "دابەشکردنی زەوی لە سنووری سلێمانی بەردەوامە، چاوەڕێین بەڕێوەبەرایەتی و فەرمانگەکان ناوی فەرمانبەران بنێرن بۆ ئەوەی زەویی بەسەر ئەو فەرمانبەرانەی ماون دابەش بکەین".

 

لەلایەکی دیکەوە: زەردەشت ڕەفیق، باسی لەوەشکرد: لە سنووری پارێزگای سلێمانی  25 هەزار پارچە زەوی جیاکراوەتەوە و بەسەر فەرمانبەراندا دابەشدەکرێن.

 

ئەمەش بزانە: لە قۆناغی دووەمدا، لە هەر پارێزگایەک بەلایەنی کەمەوە تیروپشک بۆ دابەشکردنی 10 هەزار پارچە زەوی دەکرێت، ئێستا وردبینی و پێداچوونەوە بە فۆرمی فەرمانبەرانی وەزارەتەکانی شارەوانی، دارایی، ناوخۆ، پەروەردە، خوێندنی باڵا و چەند وەزارەتێکی دیکە دەکرێت.