ئاڤا بەدواداچوون بۆ دەنگۆیەک لە قوتابخانە نێودەوڵەتییەکان دەکات

ئاڤا نیوز

بەهۆی بڵاوبوونەوەی دەنگۆی فرۆشتنی پرسیاری تاقیکردنەوەکانی پۆلی 12 لە قوتابخانە نێودەوڵەتییەکان، وەزارەتی خوێندنی باڵا وەرگرتنیان لە زانکۆکان ڕادەگرێت تا ئەنجامی لێکۆڵینەوەکان تەواو دەبێت.

چیرۆکی سەرەکی: چەند ڕۆژێکە دەنگۆی کڕین و فرۆشتن بە پرسیاری تاقیکردنەوەکانی پۆلی 12 لە چەند قوتابخانەیەکی نێودەوڵەتی بڵاوبووەتەوە. لە هەرێمی کوردستان نزیکەی 10 قوتابخانەی نێودەوڵەتی هەیە و نزیکەی هەزار قوتابیش پۆلی 12 یان لێ تەواوکردوون، بەڵام تەنیا 410 قوتابی فۆرمی وەرگرتنیان پێشکەشی زانکۆ حکومییەکانیان کردووە، لەو ژمارەیە 240 قوتابی وەردەگیرێن. ئەوان لە قوتابخانەکانیان بە سیستەمی ئەمریکی و بەریتانی تاقیکردنەوەی کۆتایی ساڵ دەکەن، بەڵام گرفتەکە لە سیستەمی ئەمریکییە.

ئەوەی لەبارەیەوە دەگوترێت: جیاواز لە ساڵانی ڕابردوو ئەمساڵ لە چەند قوتابخانەیەک بەڕێژەیەکی زۆر نمرەی بەرز هاتووە، بە جۆرێک لە یەک قوتابخانە نزیکەی 40 قوتابی 15 لە 15 یان هێناوە، واتە 100% لە 100٪، چونکە ئەوان تاقیکردنەوەی کۆتایی ساڵ لەسەر 15 دەکەن نەوەک هاوشێوەی قوتابخانە حکومییەکان لەسەر 100.

ئەمە ناڕەزایەتیی قوتابیانی قوتابخانە نێودەوڵەتییەکانی دیکەی لێکەوتەوە، چونکە لە کێبڕکێدان و لە وەزارەتی خوێندنی باڵا 10%ی کورسی خوێندنی قوتابیانی قۆناغی یەک لە زانکۆکان بۆ قوتابخانە نێودەوڵەتییەکان دابین کراوە.

ئەم پرسە لە میدیاکان قسەی لەسەر کرا، دواتر لە ئاستێکی باڵا دەست بە لێکۆڵینەوە کرا ئایا ئەو دەنگۆیەی دەڵێت کڕین و فرۆشتن بە پرسیارەکان کراوە ڕاستە؟ وەزارەتی خوێندنی باڵاش دەستبەجێ ئەنجامی بڵاوکردنەوەی ناوی وەرگیراوانی ئەو قوتابخانانەی ڕاگرت تا ئەنجامی لێکۆڵینەوەکە ئاشکرا دەکرێت.

لێدوانە فەرمییەکان: ئاڤا میدیا لەسەر ئەم بابەتە لە چەند سەرچاوەیەکی جیاواز بەدواداچوونی کرد، د.ئالان حەمەسەعید، وەزیری پەروەردە بە ئاڤا نیوزی گوت: ئەم جۆرە تاقیکردنەوەیە لەژێر سەرپەرشتی ئێمە ناکرێت، بۆیە دەبێت لە خۆیان بپرسن.

هاوکات سەرچاوەیەک لە یەکێک لە قوتابخانە نێودەوڵەتییەکان بە ئاڤا نیوزی گوت: ئەوەی لەسەر قوتابخانە نێودەوڵەتییەکان دەگوترێت هیچی ڕاست نییە، چونکە تاقیکردنەوەکان نێودەڵەتین و لە دەسەڵاتی هیچ لایەنێکی ناوخۆییدا نییە دەستکاری بکات یان دەستی بە پرسیارەکان بگات.

لەبارەی ژمارەیەکی زۆر نمرەی بەرزیش گوتی: قوتابییەکانی ئەم قوتابخانانە لە ئاستێکی باڵادان، لە چەند ساڵی ڕابردوودا  هاوشێوەی ئەمساڵ قوتابییەکان بەردەوام نمرەی بەرزیان هێناوە.