وەزیرانی دەرەوەی عێراق، تورکیا، سووریا و لوبنان: کار بۆ ئاشتییەکی هەمیشەیی دەکەین

ئاڤا نیوز

 

وەزیرانی دەرەوەی عێراق، تورکیا، سووریا و لوبنان دەڵێن، نیگەرانن لە بەردەوامی هێرشەکانی ئیسرائیل بۆ سەر غەززە و لوبنان و جەختیش دەکەنەوە کە کار بۆ بەدیهێنانی ئاشتییەکی هەمیشەیی لە ناوچەکەدا دەکەن.

وێنە گەورەکە: ئەمڕۆ لوتکەی نائاسایی عەرەبی و ئیسلامی تایبەت بە پرسی غەززە و لوبنان، لە ڕیازی پایتەختی سعودیە بە بەشداری سەرۆک و شاندی وڵاتانی عەرەبی و ئیسلامی بەڕێوەدەچێت، باس لەوە دەکرێت لە پەیامی کۆتاییدا، لوتکەکە داوای هەنگاوی کردەیی دەکات بۆ چارەسەری دوو دەوڵەت لە نێوان ئیسرائیل و فەڵەستین.

ڕاگەیێنراوی فەرمی: وەزارەتی دەرەوەی عێراق بڵاویکردەوە، فوئاد حسێن وەزیری دەرەوە لە پەراوێزی کۆبوونەوەی وەزیرانی دەرەوەی وڵاتانی ئیسلامی لە ریاز، لەگەڵ هاکان فیدان وەزیری دەرەوەی تورکیا، عەبدوڵا بوحەبیب وەزیری دەرەوەی لوبنان و بەسام سەباغ وەزیری دەرەوەی سوریا کۆبووەوە.

 

لە کۆبوونەوەکاندا باس لە دۆخی ڕۆژهەڵاتی ناوەڕاست، پەیوەندییە دوو قۆڵییەکانی بەغدا لەگەڵ ئەنقەرە، بەیروت و دیمەشق کراوە، جەختیش کراوەتەوە لەسەر هەماهەنگی وڵاتان بۆ پاراستنی ئاسایشی ناوچەکە، پێویستی جوڵەی کۆمەڵگەی نێودەوڵەتی بۆ ڕاگرتنی گرژییەکان و وەستاندنی هەموو چارەسەرێکی سەربازیی.

 

لەلایەکی دیکەوە: وەزارەتی دەرەوەی عێراق دەشڵێت، لە کۆبوونەوەکەی نێوان فوئاد حسێن و هاکان فیدان، بەتایبەتی باس لە دۆخی غەززە و لوبنان و نیگەرانییەکان کراوە لەسەر دۆخی هاووڵاتیانی مەدەنی، لەم بوارەشدا بەغدا و ئەنقەرە جەخت لە چڕکردنەوەی هەوڵە نێودەوڵەتییەکان دەکەنەوە بۆ کەمکردنەوەی نەهامەتی گەلانی فەڵەستین و لوبنان، هاوکات کاریش دەکەن بۆ بەدیهێنانی ئاشتییەکی هەمیشەیی لە ناوچەکەدا.