ناکۆکیی نێوان محەممەد حاجی مەحموود و عەبدوڵڵای برای سەرهەڵدەداتەوە

ئاڤا نیوز

بەیانی ئەمڕۆ دووشەممە دوای ڕادەستکردنی خانووی عەبدوڵڵا حاجی مەحموود لەلایەن ئاسایشەوە بە محەممەدی برای لە گوڵەخانە، شۆفڵ و حەفارە براون بۆ ئەوەی بڕووخێنرێن.

 

وێنە گەورەکە: ماوەی 11 مانگە ناکۆکی کەوتووەتە نێوان محەممەد حاجی مەحموود، سکرتێری پارتی سۆسیال دیموکراتی کوردستان و عەبدوڵڵای برای کە ئێستا وەزیری شەهیدان و ئەنفالکراوانە و پێشتر جێگری بوو. ناکۆکییەکەیان تەنانەت ڕووبەڕووبوونەوەی سەربازی و کوژراو و برینداری لێکەوتەوە و لە هەڵبژاردنیش بە جیا بەشدارییان کرد.

 

چیرۆکی سەرەکی: دوای شەڕەکەی گوڵەخانە کە شەوی 04-04-2024 لەنێوان هێزەکانی سەر بە عەبدوڵڵای حاجی مەحموود و پاسەوانەکانی محەممەدی برای ڕووی دا، خانووی عەبدوڵڵا لەلایەن ئاسایشەوە چاودێری دەکرا، دوێنێش ڕادەستی محەممەدی حاجی مەحموود کرا. 

زانیاریی زیاتر: محەممەد حاجی مەحموود ئەمڕۆ هەوڵی ڕووخاندنی خانووەکەی داوە و شۆفڵ و حەفارەی بردوون، بەڵام دواتر کارەکە ڕاگیراوە. ئێستاش هێزێکی زۆر لە دەورووبەری خانووەکە جێگیرکراون.

لێدوانی فەرمی: ئەندامێکی مەکتەبی سیاسیی سۆسیال دیموکرات بە ئاڤای گوت، "سەرەتا پێشنیازی ڕووخاندن هەبووە، بەڵام دواتر بۆچووونێک هەبووە  بکرێتە نەخۆشخانە، تاوەکو ئێستاش بڕیاری کۆتایی لەسەر نەدراوە چی لێبکرێت."

بۆچوونی بەرامبەر: کەسێکی نزیکی عەبدوڵڵای حاجی مەحموود بە ئاڤای ڕاگەیاند: "بابەتەکە دەستی لایەنێکی ناوخۆیی لەپشتە و دەیانەوێت کێشەکان قووڵتر ببنەوە".