سوودانی و ئەسەد مەترسییەكانی پەڕینەوەی جەنگ بۆ سووریا تاوتوێ دەكەن

ئاڤا نیوز

 

سوودانی و بەشار ئەسەد لە ڕیازی پایتەختی سعوودیە كۆبوونەوە و مەترسییەكانی پەڕینەوەی جەنگ بۆ لوبنان و بەركەوتنی پڕووشكی شەڕەكە بە سووریا، تاوتوێ دەكەن.

 

وێنە گەورەكە: لە پەراوێزی لووتكەی وڵاتانی كۆمكاری عەرەبی و وڵاتانی هاریكاری ئیسلامی، كە لە ڕیازی پایتەختی سعوودیە بەڕێوەدەچێت، محەمەد شیاع سوودانی، سەرۆكوەزیرانی عێراق و بەشار ئەسەد، سەرۆككۆرماری سووریا كۆبوونەوە و، بارودۆخی ناوچەكە و پەرەپێدانی پەیوەندییەكانی نێوانیان تاوتوێ كرد.

 

ڕاگەیێنراوی فەرمی: نووسینگەی ڕاگەیاندنی سەرۆكوەزیرانی عێراق لە بەیاننامەیەكدا ئاماژەی بەوەكردووە، لە پەراوێزی لووتكەی ڕیاز، محەمەد شیاع سوودانی، دیدارێكی لەگەڵ بەشار ئەسەد، سەرۆككۆماری سووریا ئەنجامداوە و جەختیان لە پێویستی گەیشتن بە بڕیاری یەكلاكەرەوە لە لووتكەی ڕیاز بۆ پرسی غەززە و شەڕی سەر لوبنان، كردووەتەوە.

 

زانیاریی زیاتر: لە دیدارەكەدا باس لە پەیوەندییە دووقۆڵییەكانی نێوان عێراق و سووریا و پەرەپێدانی پەیوەندییەكان كراوە. بەشێوەیەك لە قازانجی هاوبەشی هەردوولا بێت.

 

باكگراوند: سەرەڕای ناكۆكی سیاسی و گرژی پەیوەندییەكانی نێوان عێراق و سووریا لە قۆناغی پێش پرۆسەی ئازادكردنی عێراق لە ساڵی 2003 و، ئاساییبوونەوەی پەیوەندییەكانیان لەمە بەدواوە، دوای سەرهەڵدانی شەڕ و گرژییەكانی سووریا لە ساڵی 2011 و تێكچوونی دۆخی ناوخۆی ئەو وڵاتە و هەڵوێستوەرگرتنی وڵاتانی عەرەبی بەرامبەر پێشێلكارییەكانی ڕژێمی ئەسەد بەرامبەر خەڵكی وڵاتەكە، پەیوەندییەكانی بەغدا و دیمەشقیش بەرەو ساردبوونەوە هەنگاوی نا، بەڵام نەگەیشتە ئاستی پچڕانی پەیوەندییەكانیان.