سەرۆکی جەهەپە: لە هەڵبژاردنی 31ـی ئادار کورد دەنگێکی زۆریان پێداین

ئاڤا نیوز 

 

ئۆزگور ئۆزێل، سەرۆکی جەهەپە باس لە گرنگی بوونی ڕۆڵی کورد لە هەڵبژاردنەکانی 31ــی ئاداری تورکیا و بوونیادنانی هاوکێشەی سیاسیی حکومەتی تورکیا دەکات، ئەوەش ئاشکرا دەکات دەنگی کورد لە ئیستەنبووڵ و ئەنقەرە هۆکارێک بووە بۆ سەرکەوتنی جەهەپە.

 

وێنە گەورەکە: جەهەپە کە پارتێکی ئۆپۆزسیۆنە لە تورکیایە و تاڕادەیەک لەگەڵ دەم پارتی لە چەند پرسێکدا لە بەرامبەر دەسەڵات کۆکن. لە بابەتی پرسی ئاشتەوایی کورد  پشتیوانی خۆیان بۆ کورد نیشان دەدەن.

 

لێدوانی فەرمی: ئۆزێل لە بەرنامەیەکی تەلەڤزیۆنیدا لەسەر کورد گوتی: بەبێ کورد داهاتوو بوونیاد نانرێت لە تورکیا، لە هەڵبژرادنەکانی 31ـی ئادار لە بەرئەوەی لە ئیستەنبووڵ دەم پارتی کاندیدی نەبوو، دەنگی زۆریان بە ئێمە دا، لە ئەنقەرە کورد دەنگێکی زۆری بە جەهەپە دا، ئەوان پاڵپشتییان لە ئێمە کرد.

 

ئەوەی پێویستە بیزانیت: لە هەڵبژاردنەکانی 31ی ئادار دەم پارتی کاندیدی خۆی لە ئیستەنبووڵ کشاندەوە و دەنگیان بە ئەکرەم ئیمام ئۆغلووی کاندیدی جەهەپە دا. بۆیە جەهەپە بووە براوەی گەورەترین شارەوانی ئیستەنبووڵ کە ئاکپارتی هەموو هەوڵێکی دا نەیدۆڕێنێت.

 

گۆشەیەکی دیکەی ڕووداوەکە: ئێستا پرسی ئاشتەوایی کورد و ئاساییکردنەوەی پەیوەندییەکان ڕۆژەڤی تورکیایە، جەهەپە پێی وایە دەسەڵات و مەهەپە کە لە بەرەی بەرامبەرن و لەو پرسەدا نیازیان بەرامبەر بە کورد باش نییە.