هێمن میرانی: لەبارەی قەدەغەی هاتووچۆ دەسەڵات دراوە بە پارێزگا و ئیدارە سەربەخۆكان

ئاڤا نیوز

هێمن میرانی ڕایدەگەیەنێت لەڕۆژانی پرۆسەی سەرژمێری دەسەڵات دراوەتە پارێزگار و سەرپەرشتیاری ئیدارە سەربەخۆكان بەپێی پێویست قەدەغەی هاتووچۆی سنووردار ڕابگەیێنن، دووپاتیشی دەكاتەوە، سەرژمێری بۆ ئاییندەی هەرێمی كوردستان و ناوچە كوردستانییەكانی دەرەوەی ئیدارەی هەرێم گرنگە، بۆیە پێویستە هاووڵاتییان بەمانەوەیان لە ماڵەكانیان، پرۆسەكە سەربخەن.

 

وێنە گەورەكە: دوای كۆتاییهاتنی كۆبوونەوەی لیژنەی باڵای ئەمنی بەسەرپەرشتی وەزیری ناوخۆی حكومەتی هەرێمی كوردستان و بە بەشداری بەرپرسانی كارگێڕی و ئەمنی پەیوەندیدار،  هێمن میرانی، بەڕێوەبەری گشتیی دیوانی وەزارەتی ناوخۆی حکوومەتی هەرێمی کوردستان، لە بارەی بەڕێوەچوونی پرۆسەی سەرژمێری دانیشتووان، کۆنفرانسێکی رۆژنامەوانی ئەنجامدا و پلانی ئەمنی بۆ بەڕێوەچوونی پرۆسەكە ڕاگەیاند.

 

لێدوانی فەرمی: هێمن میرانی، ڕایگەیاند، دانیشتووانی ناوچە کوردستانییەکان پێویستە لە ڕۆژانەی 17 و 18 و 19 بۆ پڕکردنەوەی فۆرمی سەرژمێری لە ماڵەکانیان بن، چونکە سەرژمێری پرۆسەیەکی نیشتمانی گرنگە و پەیوەندی بە ئاییندەی هەرێمی کوردستانەوە هەیە.

ئەوەی پێویستە بیزانیت: دوای چەندین کۆبوونەوەی شاندی حکوومەتی هەرێمی كوردستان لەگەڵ سەرۆکوەزیران و وەزیری پلاندانانی عێراق، توانرا داخوازییەکانی کورد لە پرۆسەکە لەبەرچاو بگیرێت و، سەرژمێری ساڵی 1957 بکرێتە بنەما بۆ بەڕێوەچوونی پرۆسەکە لە ناوچە کوردستانییەکانی دەرەوەی ئیدارەی سنووری هەرێم.

 

ئەمەش بزانە: بۆ ڕۆژانی سەرژمێری، دەسەڵات دراوەتە پارێزگار و سەرپەرشتیاری ئیدارە سەربەخۆکان بۆ ڕاگەیاندنی قەدەغەی هاتووچۆی سنووردار.

 

زانیاریی زیاتر: ڕۆژنامەنووسان قەدەغەی هاتووچۆ نایانگرێتەوە بەو مەرجەی لە دەزگایەکی ڕاگەیاندن کار بکەن و ناسنامەیان هەبێت، هەروەها جووڵەی بازرگانی بەردەوام دەبێت و فڕۆکەخانەکانیش گەشتەکانیان بەردەوام دەبن و نانەواخانەکان کراوە دەبن.