لە هەڵەبجە دەست بە دابەشکردنی زەوی دەکرێت

ئاڤا نیوز

 

شارەوانی هەڵەبجە بەهەماهەنگی بەڕێوەبەرایەتیی کشتوکاڵی ئەو پارێزگایە، ئامادەسازی بۆ دابەشکردنی زەوی دەکات، هاوکات سەرقاڵی دامەزراندنی کارمەندن بۆ لیژنەکان و دانانی نەخشەی کەرتی زەوییەکان.

 

وێنە گەورەکە: لە پارێزگاکانی هەولێر، سلێمانی و دهۆک هەزاران پارچە زەوی بەسەر فەرمانبەران دابەشكراون، بەهۆی نەبوونی زەوی لە سنووری پارێزگای هەڵەبجە قۆناغی یەکەمی دەستی پێنەکردووە، بەگوێرەی داتاکانی وەزارەتی شارەوانی و گەشتوگوزار زیاتر لە 15 هەزار فەرمانبەر و خانەنشینی سنووری ئەو پارێزگایە لە وەرگرتنی زەوی سوودمەند دەبن.

 

لێدوانی فەرمی: فەرحان عیزەت، وتەبێژی شارەوانیی هەڵەبجە بە ئاڤا نیوزی گوت: "لیژنەکان پێکهێنراون و لە قۆناغی یەکەم بڕیار لەسەر ئەو شوێنانە دەدەن کە بەهەماهەنگی بەڕێوەبەرایەتیی کشتوکاڵی پێشنیازکراون، لە هەنگاوی دواتر زەوییەکان جیا دەکرێنەوە."

 

زانیاریی زیاتر: ئەو زەوییانەی بەسەر فەرمانبەرانی هەڵەبجە دابەش دەکرێن، دەکەونە دەرەوەی سنووری پارێزگاکە، ناوچەکانی عەبابەیلێ، جەلیلە، نێوان ناحیەی سیروان و پارێزگای هەڵەبجە دەبێت.