بەرپرسی سیاسەتی دەرەوەی یەکێتیی ئەوروپا: شەڕی ئیسرائیل لە غەززە شەڕی دژ بە منداڵانە

ئاڤا نیوز

 

جۆزێف بۆرێل، بەرپرسی سیاسەتی دەرەوەی یەکێتیی ئەوروپا لە میانەی کۆنگرەیەکی ڕۆژنامەوانیدا لە برۆکسێل ڕایگەیاند، "هیچ وشەیەکی نییە بۆ ئەوە دۆخی ڕۆژهەڵاتی ناوەڕاست و شەڕی غەززەی پێ وەسف بکات." 

 

لێدوانی فەرمی: جۆزێف بۆرێل، ڕەخنەی لە بەئامانجگرتنی مەدەنییەکان لەلایەن ئیسرائیلەوە گرت و گوتی، "ئەوەی ڕوودەدات شەڕە لە دژی منداڵانی غەززە، چونکە نزیکەی 44 هەزار کەس لە غەززە کوژراون کە 70٪ـیان ژن و منداڵن کە زۆربەی منداڵەکانیش تەمەنیان لە خوار نۆ ساڵییەوەیە."

 

زانیاریی زیاتر: بۆرێڵ کە سەرۆکایەتیی کۆبوونەوەی وەزیرانی دەرەوەی یەکێتییەکەی دەکرد دۆخی غەززەی بە ترسناک وەسف کرد و دوپاتی کردەوە کە ئەو پێشتر پێشنیازی کردبوو کە یەکێتیی ئەوروپا وەک نیشاندانی ناڕەزایی بەرامبەر بە پێشێلکردنی مافەکانی مرۆڤ لە غەززە، گفتوگۆ سیاسییەکانی لەگەڵ ئیسرائیل بوەستێنێت، بەڵام هەوڵەکەی بێئەنجام بوو و وڵاتان پشتیوانیان نەکرد. 

 

لەلایەکی دیکەوە: ڕێکخراوی ئۆکسفامی خێرخوازی لە بەیاننامەیەکدا ڕایگەیاند، "یەکێتیی ئەوروپا دەستی بە خوێنی منداڵانی غەززە سوورە." داواشی کرد یەکێتییەکە هەوڵەکانیان بۆ ئاگربەست زیاتر بکەن و ڕێککەوتننامەی هاوبەشیی نێوانی لەگەڵ ئیسرائی هەڵپەسێرێت و هەناردەکردنی چەک بۆ ئیسرائیل ڕا بگرێت.