ماوەی خۆتۆمارکردن لە پرۆسەی بایۆمەتری مووچەخۆران درێژدەکرێتەوە

ئاڤا نیوز

 

پرۆسەی بایۆمەتری مووچەخۆرانی هەرێمی کوردستان بەردەوام دەبێت و ماوەکەی درێژکرایەوە، بەپێی زانیارییەکانی ئاڤا ئێستا کەمتر لە 15 هەزار مووچەخۆر ماون بایۆمەترییان بۆ بکرێت.

 

وێنە گەورەکە: ڕۆژی چوارشەممە 20-11-2024، وەک دوایین وادە دیاریکرابوو لەبەردەم مووچەخۆرانی هەرێمی کوردستان بۆ ئەوەی لە پرۆسەی بایۆمەتری تۆماربکرێن، بڕیارەکە وابوو هەرکەس بایۆمەتری نەبێت، ناوی لە لیستی مووچەخۆرانی هەرێمی کوردستان بسڕدرێتەوە.

 

زانیاریی تایبەت: بەگوێرەی بەدواداچوونەکانی ئاڤا کە لە فەرمانگەی تەکنەلۆژیای زانیاریی حکومەتی هەرێمی کوردستان دەستیکەوتووە، پرۆسەکە درێژکراوەتەوە و بایۆمەتری تاوەکو کۆتایی ئەمساڵ بەردەوام دەبێت، بۆ ئەوەی سەرجەم مووچەخۆران خۆیان تۆماربکەن و UPNیان هەبێت.

 

زانیاریی زیاتر: لە یەک ملیۆن و 114 هەزار مووچەخۆری هەرێمی کوردستان کەمتر لە 15 هەزار مووچەخۆر ماون کە بایۆمەتری بکەن و UPNـیان بۆ دروستبکرێت، ئەوانەش بەشێکیان لە دەرەوەی وڵات دەژین و بەشێکیش لەوانە خوار تەمەنی 12 ساڵین [ ئەو کەسانەن کە مووچەی باوکیان وەردەگرن] و بەپێی ڕێنمایی نوێ دەبێت UPNیان هەبێت، ئەمەش کاتی زیاتری پێویستە، بۆیە ماوەی پرۆسەکە درێژکرایەوە.

 

لەلایەکی دیکەوە: بەهۆی بەڕێوەچوونی پرۆسەی سەرژمێری گشتی و قەدەغەی هاتووچۆ، ڕۆژی چوارشەممە و پێنج شەممەی ئەم هەفتەیە لەسەرجەم دامودەزگاکانی هەرێمی کوردستان پشووی فەرمییە، پرۆسەی بایۆمەتری دەوەستێت و ڕۆژی یەکشەممە دەستپێدەکاتەوە.