دوو ساڵ جەنگ و زیاتر لە نیو ملیۆن قوربانی

ئاڤا نیوز

ئەمڕۆ جەنگی نێوان ڕووسیا و ئۆکراینا پێدەنێتە نێو ساڵی سێیەمەوە، لە ماوەی دوو ساڵی رابردوودا زیاتر لە نیو ملیۆن کەس بەهۆی جەنگەوە بوونەتە قوربانی.

 

چی ڕوویدا؟ 

لە 24-2-2022، بە فەرمانی ڤلادمیر پوتین، سەرۆکی ڕووسیا " ئۆپەراسیۆنێکی تایبەت" بۆ  کیێڤ دەستپێکرد و ئۆکرایناش بەرگری لە خاکەکە دەکات، لەو رۆژەوە تاوەکو ئێستا، چەندین ناوچەی ئۆکراینا داگیرکراون و چوار شاریش کە پێشتر سەر بە ئۆکراینا بوون، ئێستا لەژێر رکێفی ڕووسیادان. 

 

دوای هێرشەکان، ئەوروپا و رۆژئاوا بەگشتی پشتگیریی خۆیان بۆ ئۆکراینا دەربڕی، هاوکاریی ماددی و سەربازییان پێشکەشی کرد ئۆکراینا کرد، سزای دارایی و دیپلۆماسیشیان لە چەندین بواردا بەسەر ڕووسیادا سەپاند. 

 

دوای دوو ساڵ سەرکردەکان چی دەڵێن؟ 

ڤۆلۆدمیر زیلێنسکی، سەرۆکی ئۆکراینا: دابینکردنی چەک بۆ ئۆکراینا  دەبێت کاری لە پێشینەی وڵاتانی رۆژئاوا بێت.

 

ئۆرسولا ڤۆن دێر لاین، سەرۆکی کۆمیسیۆنی یەکێتیی ئەوروپا ستایشی "بەرخۆدانی نائاسایی" ئۆکراینای کرد کاتێک گەیشتە کیێڤ.

جۆ بایدن، سەرۆکی ئەمریکا: مێژوو چاوەڕوانە و پاڵپشتی نەکردنی ئۆکراینا لەم ساتەوەختە گرنگەدا لەبیرناکرێت.

 

ڕیشی سوناک، سەرۆکوەزیرانی بەریتانیا گوتی: "ستەمکاری هەرگیز سەرناکەوێت".

 

هاوکارییەکان بەردەوام دەبن؟ 

ئەمریکا ڕێگری لە پاکیجێکی گەورەی هاوکاریی "60 ملیار دۆلاری" کردووە و بایدنی سەرۆکی ئەمریکاش هەوڵ دەدات ئەو رێگرییە لاببات و هاوکارییەکان بگەیێنیتە کیێڤ.

 

بەریتانیا پاکێجێکی نوێی بە بڕی 245 ملیۆن پاوەند (311 ملیۆن دۆلار) بۆ یارمەتیدانی بەرزکردنەوەی بەرهەمهێنانی "تەقەمەنی تۆپخانەیی بەپەلەی پێویست" بۆ ئۆکراینا ڕاگەیاند.

ژمارەکان وا دەڵێن:

لە ماوەی ئەو سێ ساڵەدا، 383 هەزار سەربازی ئۆکراینی کوژراو و بریندار بوون.

10 هەزار و 378 هاووڵاتیی ئۆکراینی کوژراون و 19 هەزار و 632 کەسی دیکە برینداربوون.

150 هەزار سەربازی ڕووسیا کوژراون و 222 هەزاری دیکەش برینداربوون.