لە بازگەی چیمەن و بازگەی پردێ بەتۆمەتی وەرگرتنی بەرتیل ژمارەیەک ئەفسەر و پۆلیس دەستگیر دەکرێن

ئاڤا نیوز

 

ژمارەیەک ئەفسەر و پۆلیسی عێراق لە بازگەی چیمەن و پردێ بە تۆمەتی گەندەڵی و وەرگرتنی بەرتیل دەستگیر کراون، بەمەبەستی لێکۆڵینەوە ڕەوانەی بەغدا کراون.

 

چیرۆکی سەرەکی: لە ماوەی ڕابردوو لەلایەن وەزیری ناوخۆی عێراق ئاگاداری ژمارەیەک ئەفسەر و پۆلیسی بازگەکانی چیمەن پردێ کراوەتەوە کە سەردانی بەغدا بکەن بە مەبەستی لێکۆلینەوە لەسەر ئەوەی تۆمەتی گەندەڵی و وەرگرتنی بەرتیلیان کراوەتە پاڵ، بەڵام داواکراوەکان پابەندی ئاگادارییەکە نەبوون.

 

لێدوانی فەرمی: فەرماندەیەکی باڵا لە بەڕێوەبەرایەتی پۆلیسی کەرکووک بە ئاڤا نیوزی ڕاگەیاند: دوای پابەند نەبوونی ئەفسەر و پۆلیسەکانی بازگەکانی چیمەن و پردێ بە فەرمانی وەزیری ناوخۆی عێراق دەستگیرکراون و ڕەوانەی بەغدا کراون بۆ لێکۆلینەوە، ژمارەی دەستگیرکراوان زیاتر لە 180 ئەفسەر و پۆلیس دەبێت.

 

زانیاریی بەدەستهاتوو: ئەو ئەفسەر و پۆلیسانە کە بەرتیلیان وەرگرتووە، دابەشکراون بەسەر ئەو کەلوپەلانەی لەو دوو بازگەیە تێپەڕیوون، بۆ نموونە بەشێک لە ئەفسەر و پۆلیسەکان پارەیان لەو بارهەڵگرانە وەرگرتووە کە مریشکیان بارکردووە، بەشێکی دیکە پارەیان لەو بارهەڵگرانە وەرگرتووە کە جگەرەیان گواستووەتەوە. بەمشێوە هەر بەشێک لە ئەفسەر و پۆلیسەکان تایبەت بوون بە وەرگرتنی پارە لە شوفێر و بارهەڵگرانە کە لە بازگەکان تێپەڕیوون.