گرووپی شانۆیی هەوار لە میسر خەڵاتی باشترین بەرهەمی شانۆیی بەدەستهێنا

ئاڤا نیوز

 

گروپی شانۆیی (هەوار) لە شاری کەرکووکەوە بەشدارییان لە خولی نۆیەمی فێستیڤاڵی نێودەوڵەتیی شانۆی گەنجانی (شرم الشیخ) لە وڵاتی میسر کرد و توانییان خەڵاتی باشترین شانۆیی ببەنەوە.

 

وێنە گەورەکە: شانۆی مۆنۆدرامای سەلمە بە نوێنەرایەتی هەرێمی کوردستان و عێراق بەشداری فێستیڤاڵەکەیان کرد و کە تێیدا 30 وڵاتی دیکەش بەشداربوون.

 

لێدوانی فەرمی: نەژاد نەجم، دەرهێنەری شانۆییەکە بە ئاڤا میدیای گوت: مۆنۆدرامای سەلمە چیرۆکی تراژیدیای کورد دەگێڕێتەوە و تێمای سەرەکی نمایشەکە ئەنفال و کۆچی گەنجانە.

 

گوتیشی، لە فێستیڤاڵەکەدا زیاتر لە 40 بەرهەم پێشکەشکران و سەلمە توانی خەڵاتی باشترین بەرهەم بباتەوە.

 

ئەمەش بزانە: شانۆیی سەلمە چەندین جار نمایشکراوە و بەشداری چەندین فێستیڤاڵی نێودەوڵەتی کردووە، یەکەم نمایشی شانۆییەکەش لە سەربازگەی تۆپزاوا بوو، (شوێنی زیندانیکردنی ئەنفاڵکراوان) دواتریش لە شارەکانی چەمچەماڵ و سلێمانی و هەڵەبجە و وڵاتانی تونس و ئوردن و تورکیا نمایشکرا.