بەشێكی هاووڵاتیانی كەندێناوە بەهۆی نەبوونی شوێنی مانەوە سەرژمێر نەكراون

ئاڤا نیوز

 

بەگوێرەی زانیارییەکان تا ئەمڕۆ پێنجشەممە ڕێژەی تۆماركردنی هاووڵاتیان لە سەرژمێریی گشتی دانیشتووانی سنووری قەزای مەخموور و ناحیەكانی دەوروبەری، 95% ـبووە، هاوكات بەشێكی زۆری هاووڵاتیانی شارەدێی كەندێناوە لەبەر نەبوونی شوێنی مانەوە لە تۆماری سەرژمێری تۆمارنەكراون.

 

وێنە گەورەكە: ئەمڕۆ لەڕۆژی دووەمی قۆناغی دووەمی سەرژمێری دا، پرۆسەکە لە مەخموور و دەوروبەری بەردەوام بوو. بەگوێرەی زانیارییەكان، 95%ـی هاووڵاتیانی سنوورەکە تۆمارکراون، بەڵام بەهۆی نەبوونی شوێنی مانەوە، بەشێکی زۆری هاووڵاتیان بێبەش بوون لە تۆمارکردنی ناوەکانیان.

 

لێدوانی فەرمی: بەیار حەسەن نەجاڕ، بەڕێوەبەری ناحیەی کەندێناوە بە ئاڤا میدیای ڕاگەیاند: بژمێرەکانی سەرژمێری بەردەوامن لە تۆمارکردنی هاونیشتمانیان لە سنووری ناحیەکە، لە سەنتەری ناحیەکە لە 100% پرۆسەکە تەواو کراوە، لە گوندەکان لە 95% هاونیشتمانیان تۆمارکراون، هاوکات لەنێو کەمپی دیبەگە کێشە لە سیستمی تۆمارکردن و ئایپادەکانی بژمێرەکان هەبووە و هەوڵی چارەسەکردنی دراوە، ئێستا بژمێرەکان بەردەوامن لە تۆمارکردنی خەڵکی نێو کەمپەکە، لە 90%یان تۆمار کراون.

 

هۆكارە زانراوەكان: سەرەڕای ئەوەی هاووڵاتیانی سنووری ناحیەی كەندێناوە بەگڕوتینەوە گەڕانەوە زێدی نیشتەجێبوونی باب و باپیرانیان، بەڵام بەپێی مەرجی وەزارەتی پلاندانان خانووی بەجێهێڵدراو یاخود شوێنی خانوو تۆمارناكرێت و تەنیا نیشتەجێبووانی ئەو خانووانە تۆماركراون كە بە تەواوی كەرەستەكانی ژیانی تێدایە و بەكەڵكی ژیان دێن.