وەزیری پلاندانان دڵنیایی دەدات؛ تاوەکو کەسێک مابێت سەرژمێری بەردەوام دەبێت

ئاڤا نیوز 

وەزیری پلاندانانی هەرێمی کوردستان لەبارەی سەرژمێری دڵنیایی بەو خێزانانە دەدات کە تاوەکو ئێستا تۆمارنەکراون، دەڵێت پرۆسەکە کۆتایی نایەت و داوایان لێ دەکات سبەی لە ماڵ بمێننەوە.

وێنە گەورەکە: لە هەرێمی کوردستان 99%ی خەڵک لە سەرژمێری تۆمارکراون و تەنیا 1٪ ماوە تۆمار بکرێن، بەڵام لە عێراق ڕێژەکە کەمترە و تەنیا 95%ی خەڵک تۆمارکراون.

 

ڕاگەیێنراوی فەرمی: د. دارا ڕەشید، وەزیری پلاندانانی حکومەتی هەرێمی کوردستان ڕایگەیاند: هاووڵاتیان بەشێوەیەکی بەردەوام پەیوەندی بەسەنتەری ژووری ئۆپەراسیۆنەکانی سەرژمێری و بەڕێوبەرایەتیەکانی ئاماری پارێزگاکان دەکەن بۆ ئەوەی دڵنیاببنەوە کە سەردان دەکرێن.

 

لەبارەی تۆمارکردنی ئەو خێزانانەی کە تاوەکو ئێستا ناوەکانیان تۆمار نەکراوە، د. دارا ڕەشید دەڵێت، هاووڵاتیانی هەرێمی کوردستان دڵنیا دەکەینەوە تاوەکو تۆمارکردنی هەموو خێزانەکان پرۆسەکە بەردەوام دەبێت. 

 

وەزیری پلاندانانی حکومەتی کوردستان داوا لەو خێزانانە دەکات ک تاوەکو ئێستا تیمەکانی سەرژمێری سەردانیان نەکردوون و تۆمارنەکراون، لە ماڵەکانیان بمێننەوە، چونکە پرۆسەکە بەردەوام دەبێت تا دوایین خێزان و دوایین هاووڵاتی تۆمار دەکرێت.

ئەوەی پێویستە بیزانیت: قۆناغی دووەمی سەرژمێری کە ژماردنی دانیشتووانە، کاتژمێر 12:00ی ئەمشەو کۆتایی دێت، مەبەستی د.دارا ڕەشید ئەوەیە قۆناغی دووەمی سەرژمێری ئەمشەو کۆتایی نایەت، بەڵکو پرۆسەکە درێژ دەکرێتەوە تاوەکو سەرجەم خێزانەکان تۆمار دەکرێن.