پرۆسەی سەرژمێری زیندانەکانیشی گرتەوە

ئاڤا نیوز

 

تیمەکانی سەرژمێری لە زیندانی چاکسازی گەورانی هەولێر ماوەی دوو ڕۆژە سەرقاڵی تۆماکردنی ناوی زیندانییانن و ئەمڕۆ پرۆسەکە کۆتایی هاتووە.

 

وێنە گەورەکە: پرۆسەی سەرژمێری گشتی لە عێراق بە سێ قۆناغ ئەنجام دەدرێت، ئەمشەو کاتژمێر 12ی شەو قۆناغی دووەم کۆتایی دێت و لە چەند ڕۆژی ئایندە قۆناغی سێیەم دەستپێدەکات.

 

لێدوانی فەرمی: سەلام جەمال، بەڕێوەبەری چاکسازی گەورانی هەولێر بە ئاڤا نیوزی ڕاگەیاند، لە ڕۆژی سێشەممەوە تیمەکانی سەرژمێری هاتوونەتە بەڕێوەبەرایەتی چاکسازی گەورانی هەولێر و تەنیا ناوی ئەو زیندانییانە تۆمار دەکەن کە سزادراون (محکوم)ن، پرۆسەکە لە ڕۆژی سێشەممە دەستیپێکرد و ئێوارەی ئەمڕۆ پێنجشەممە کۆتایی پێهاتووە.

 

زانیاریی زیاتر: بە وتەی بەڕێوەی چاکسازی گەورانی هەولێر، پرۆسەکە بەجۆرێک بووە کە تیمەکان زیندانییەکانیان نەبینیوە، بەڵکو لەڕێگەی فەرمانبەرانی بەڕێوەبەرایەتیی چاکسازی سێ جۆر زانیاری دراون بە تیمەکە، ئەوانیش ناوی سیانی، ڕێککەوتی لەدایکبوون و ناوی دایک بووە. 

 

زانیاریی بەدەستهاتوو: بە گوێرەی زانیارییەکانی ئاڤا، ئەو زیندانییانەی ڕاگیراون هێشتا لە دادگە سزا نەدراون لەسەر خێزانەکانیان تۆمار کراون و بە جیا نەبووە.

 

باکگراوند: پرۆسەی سەرژمێری گشتی ئەمجارە دوای 37 ساڵ دێت، عێراق دەیەوێت داتایەکی دروست لەبارەی گەشەی دانیشتوان بەدەست بخات.