ماڵی وەفایی ساڵانە چوار پێشبڕکێ ڕادەگەیێنێت

ئاڤا نیوز

 

بە ئامانجی بەرەودان بە کولتووری خوێندنەوە و ئاشناکردنەوەی خەڵک و هاندانی گەنجان بە خوێندنەوە، ناوەندی ڕۆشنبیری و ئەدەبی ماڵی وەفایی دەستپێشخەرییەک ڕادەگەیێنێت.

 

چیرۆکی سەرەکی: ناوەندەکە ساڵانە چوار پێشبڕکێ ڕادەگەیێنێت و هەر وەرزێک کتێبێک ئامادە دەکات، بۆ ئەوەی خوێنەران لە هەرێمی کوردستان و دەرەوەی وڵات ڕانان و خوێندنەوەی خۆیان لەبارەی کتێبەکەوە پێشکەش بکەن، هاوکات براوەکان خەڵات دەکرێن.

 

لێدوانی فەرمی: ڕێبین فەتاح، بەڕێوەبەری ماڵی وەفایی بە ئاڤا نیوزی ڕاگەیاند: کاتێک خوێنەران ڕانان و خوێندنەوەکانیان لەسەر کتێبە دیاریکراوەکان دەکەن، لەلایەن لیژنەیەکی تایبەتمەندەوە باشترین سێ ڕانان دیاری دەکرێن، دواتر براوەی یەکەم بە 50 کتێب، براوەی دووەم بە 25 کتێب و سێیەم بە 15 کتێب لەلایەن ماڵی وەفایییەوە خەڵات دەکرێن.

 

زانیاریی زیاتر: بە گوتەی بەڕێوەبەری ماڵی وەفایی، ڕانان لەبارەی هەموو ئەو کتێبانە دەکرێت کە بۆ کورد گرنگن، بەتایبەت کتێبی نووسەرانی کورد لەبوارەکانی، شیعر و ڕۆمان، سیاسی، کۆمەڵایەتی، یادداشت و بیرەوەری.

 

ئەوەی پێویستە بیزانیت: یەکەم کتێب کە بۆ خوێندنەوە و ڕانان لەم وەرزەدا ڕادەگەیەنرێت، کتێبی "مانای ژیانم" یان بیرەوەرییەکانی کوبرای عەزیمییە. کوبرای عەزیمی لە یەکەمین مامۆستایانی قوتابخانەی کچان بوو لە دەورانی کۆماری کوردستاندا و وەک نووسەریش چەندین وتاری لە ڕۆژنامەی "کوردستان"ی سەردەمی کۆماری کوردستان بڵاوکردووەتەوە. "مانای ژیانم" کە بیرەوەرییەکانی خاتوو کوبرا لەخۆدەگرێت، لەلایەن "سیمین ئیفتیخاری"ی کچییەوە ئامادەکراوە. لە دووتوێی زیاتر لە 250 لاپەڕە و لەلایەن ماڵی وەفاییەوە چاپ و بڵاوکراوەتەوە.