سەرۆكی ئەنجوومەنی نوێنەرانی ئەمریكا لەلایەن كۆشكی سپییەوە تۆمەتبار دەكرێت

ئاڤا نیوز

کۆشکی سپی ڕەخنەی تووند لە مایک جۆنسۆن، سەرۆکی ئەنجوومەنی نوێنەرانی ئەمریکا دەگرێت، تۆمەتباری دەکات بەوەی لە ڕێگەی ڕێگریکردن لە پەسەندکردنی پڕۆژەیاسای ناردنی کۆمەک بۆ ئۆکراینا، یارمەتیی ئێران و ڕووسیا دەدات.

ڕاگەیێنراوی فەرمیی: ئەندرۆ بەیتس، یاریدەدەری گوتەبێژی کۆشکی سپی و ڕاوێژکاری باڵای پەیوەندییەکان، ڕایگەیاند:"ئێران بە تەواوەتیی هەوڵ دەدات تواناکانی ڕووسیا لە شەڕی دژ بە ئۆکراینا و لە هێرشەکانی بۆ سەر شارەکانی ئوکراینا زیاتر بکات. ڕێگرییەکانی جۆنسۆن بە شێوەیەکی پراکتیکی لە بەرژەوەندیی پووتین و ئایەتوڵڵادایە".

بۆچوونی لایەنی بەرامبەر: گوتەبێژی جۆنسۆن ڕایگەیاند: خودی ئیدارەی بایدن ئەو تۆمەتانەی لە سەرن کە جانسۆنی پێ تۆمەتبار کردووە. حوسییەکانی لە لیستی تیرۆر دەرهێناوە و سزاکانی سەر هەناردەی نەوتی ئێرانی کەم کردووەتەوە، بە هۆی ڕێگرییەکانیشەوە وڵاتانی ئەوروپا ناچارن لە بری ئەمریکا لە ڕووسیا گاز بکڕن. 

باکگراوند: هەفتەی ڕابردوو، ئەنجوومەنی پیرانی ئەمریکا پڕۆژەیەکی ئەمریکای بە بڕی 95 ملیار دۆلار بۆ کۆمەککردن بە ئۆکراینا، ئیسرائیل و تایوان پەسەند کرد. پڕۆژەکە پێویستیی بەوە هەیە لە ئەنجوومەنی نوێنەرانیش پەسەند بکرێت، بەڵام سەرۆکی ئەنجوومەنەکە پشوویەکی دوو هەفتەیی ڕاگەیاندووە تا ئەنجوومەن کۆنەبێتەوە.