قۆناغی سێیەمی سەرژمێری لە هەرێمی کوردستان پێنج ڕۆژ دوادەکەوێت

ئاڤا نیوز

 

بەڕێوەبەری ئاماری هەولێر دەڵێت بە سێ هۆکار قۆناغی سێیەمی سەرژمێری لە هەرێمی کوردستان پێنج ڕۆژ دوا دەکەوێت. 

وێنە گەورەکە: پرۆسەی سەرژمێری لە هەرێمی کوردستان و عێراق تەنیا یەک قۆناغی ماوە، ئەویش تۆمارکردنى تایبەتمەندییە کەسى و خێزانییەکان و 70 پرسیارەکەیە و تاوەکو 20-12ی ئەمساڵ بەردەوام دەبێت.

 

لێدوانی فەرمی: دڵزار حەمەساڵح، بەڕێوەبەری ئاماری هەولێر ڕاگەیاند: "لە هەرێمی کورستان بە گشتیی و لە هەولێر بەتایبەتی پرۆسەی سەرژمێری بەسەرکەتوویی بەڕێوەچوو، قۆناغی سێیەم لە عێراق دەستیپێکردووە، بەڵام لە هەرێمی کوردستان بۆ ماوەی پێنج ڕۆژ دوادەکەوێت".

هۆکارە زانراوەکان: لە هەرێمی کوردستان بژمێرەکان دەچنەوە خولی ڕاهێنان، دوو هۆکاری دیکەش کێشەی تەکنیکی و دواکەوتنی تەرخانکردنی پارەن بۆ هەرێمی کوردستان.

کاریگەری و لێکەوتەکان: پێشبینی دەکرێت بەهۆی دواکەوتنی پرۆسەکە، تەواوبوونیشی بەراورد بە عێراق دوابکەوێت، بەڵام دڵزار حەمەساڵح دەڵێت ئەگەر پرۆسەکە لە وادەی دیاریکراودا تەواو نەکرێت، هەرێمی کوردستان دەتوانێت داوای درێژکردنەوەی بکات.