گوژمەیەکی دیکەی پارەی گەنمی جووتیاران دابەش دەکرێت

ئاڤا نیوز 

بەشێکی دیکەی پارەی گەنمی جووتیارانی هەرێمی کوردستان خەرج دەکرێت و بڕیارە تاوەکو ڕۆژی پێنجشەممە پارەکە بگاتە سەرجەم سایلۆکان.

 

وێنە گەورەکە: وەزارەتی بازرگانی عێراق، بڕیاری خەرجکردنی 158 ملیار و 454 ملیۆن دیناری وەک پشکی هەرێمی کوردستان داوە، هاوکات چەکی پارەی جووتیارانی هەرسێ پارێزگای هەولێر، سلێمانی و دهۆک ئامادەیە. دوای وەرگرتنی ڕەزامەندی پارەکە لە لقی هەولێری بانکی ناوەندییەوە دەگوازرێتەوە بۆ بانکەکانی هەرێمی کوردستان، بەشێوەیەک هەر پارێزگایەک پشکی خۆی وەردەگرێت.

 

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی هەرێمی کوردستان بە ئاڤا نیوزی ڕاگەیاند، "لە ماوەی دوو ڕۆژی داهاتوودا دەست بە خەرجکردنی پارەکە دەکرێت، تاوەکو ڕۆژی پێنجشەممەش چەکی پارەی سەرجەم پارێزگاکان خەرج دەکرێت."

 

ئەوەی پێویستە بیزانیت: وەزارەتی بازرگانی عێراق، لە کۆی 598 ملیار دینار پارەی گەنمی جووتیارانی هەرێمی کوردستان، تاوەکو ئێستا بڕی 476 ملیار دیناری بەچەند قۆناغێک خەرجکردووە، نزیکەی 123 ملیار دینار ماوە و بڕیارە پێش کۆتایی ئەمساڵ خەرج بکرێت.

 

ژمارەکان وادەڵێن: ئەو 158 ملیار و 454 ملیۆن دینارەی بڕیاری خەرجکردنی دراوە بەمشێوەیە بەسەر پارێزگاکاندا دابەش دەکرێت:-

هەولێر: 55 ملیار و 454 ملیۆن دینار.
سلێمانی: 60 ملیار دینار.
دهۆک: 43 ملیار دینار.