ئەنجامی بەرایی سەرژمێریی دانیشتووان لە هەرێمی کوردستان؛ گەنجان زۆرینەن

ئاڤا نیوز 

 

وەزیری پلاندانانی هەرێمی کوردستان ئەنجامی بەرایی سەرژمێری گشتیی ڕاگەیاند،  بەگوێرەی ئەنجامەکان زۆرینەی دانیشتووان گەنجن و لە تەمەنی کارکردندان.

 

وێنە گەورەکە: ڕۆژانی 20  و 21ی ئەم مانگە سەرژمێریی گشتیی دانیشتووان لە تەواوی عێراق بە هەرێمی کوردستانیشەوە کرا. 

لێدوانی فەرمی: د. دارا ڕەشید، وەزیری پلاندانانی حکومەتی هەرێمی کوردستان ڕایگەیاند: بەگوێرەی ئەنجامی فەرمی سەرژمێری زۆرینەی دانیشتووان لە هەرێمی کوردستان گەنجن و لە تەمەنی کارکردندان، بەراورد بە سەرژمێری و گەمارۆسازی ساڵی 2009 ڕێژەی گەشەی دانیشتووان 2.48٪ زیادی کردووە.

 

ئاماری بەرایی سەرژمێری لە هەرێمی کوردستان بەم جۆرەیە؛ 

ڕێژەی دانیشتووان: شەش ملیۆن و 370 هەزار و 668 کەس.

ڕێژەی شارنشین: 84%.

ڕێژەی گوندنشین: 16%.

ژمارەی خێزان: یەک ملیۆن و 379 هەزار و 163 خێزان.

تێکڕای قەبارەی خێزان: 4.6 کەس.

ژمارەی نێر: سێ ملیۆن و 200 هەزار  و 506 کەس.

ژمارەی مێ: سێ ملیۆن و 170 هەزار 162 کەس.

ڕێژەی نێر: 50.24%.

ڕێژەی مێ: 49.76%.

تێکڕای گەشەی دانیشتووان: 2.48٪.

ڕێژەی ئەو خێزانانەی ژن سەرۆکیەتی: 11.86%.

ڕێژەی ئەو خێزانانەی پیاو سەرۆکیەتی: 88.14٪%.

دابەشبوونی دانیشتووان بەگوێرەی تەمەن: خوار تەمەنی 15 ساڵ 31.9%، تەمەنی کارکردن 63.7٪، تەمەنی سەروو کارکردن 4.4٪.

ژمارەی یەکەی نیشتەجێبوون: دوو ملیۆن و 28 هەزار و 937 یەکە.

 

لە لایەکی دیکەوە: محەممەد شیاع سوودانی، سەرۆکوەزیرانی عێراق ڕایگەیاند: ئێستا ژمارەی دانیشتووان گەیشتووەتەوە 45 ملیۆن و 200 هەزار کەس، بەگوێرەی ئەو ئامارەش 2.3 %ـی ڕێژەی دانیشتووانی عێراق زیادیکردووە.

 

زانیاریی زیاتر: لە سەرژمێری و گەمارۆسازی ساڵی 2009دا ژمارەی دانیشتووانی هەرێمی کوردستان چوار ملیۆن و 389 هەزار و 258 کەس بووە.