کریملن: بایدن دەیەوێت ڕێگری بکات لە بەرپابوونی ئاشتی

ئاڤا نیوز

ڕووسیا ئیدارەی بایدن بەوە تاوانبار دەکات، کە دژی سەرۆکی داهاتووی ئەمریکا کار دەکات، بە ئامانجی ئەوە کێشەکانی ئۆکرانیا چارەسەر نەبن.

 

وێنە گەورەکە: جەنگی ڕووسیا لە دژی ئۆکراینا بەردەوامی هەیە، ڕووسیاش زۆرینەی کات ئەمریکا و وڵاتانی ئەوروپا بەوە تاوانبار دەکات کە ئەو وڵاتانە دەیانەوێت ئاگری شەڕەکە بەردەوام بێت، بە دابینکردنی چەک و پێشکەشکردنی هاوکارییە سەربازییەکان.

 

لێدوانی فەرمی: دیمیتری بیسکۆف، وتەبێژی کۆشکی کریملن، لە چاوپێکەتنێکیدا لەگەڵ تەلەفزیۆنی فەرمی ڕووسیا دەڵێت، لە کاتی بانگەشەی هەڵبژاردن، ترەمپ، زۆر لەبارەی ئاشتییەوە قسەی کرد و دەیویست هەموو لایەک بەرەو ئاشتی هەنگاو بنێین. بەڵام ئیدارەی ئێستای بایدن هەموو کارێک دەکەن تا ببنە ڕێگر لەبەردەم ڕێککەوتنی ئاشتی. 

 

لەلایەکی دیکەوە: لە بەشێکی تری چاوپێکەوتنەکەدا بیسکۆف دەڵێت، مۆسکۆ دەبێت ئاگاداربێت لەوەی ئاخۆ سەرۆکی هەڵبژێردراوی ئەمریکا، دۆناڵد ترەمپ لەسەر هەمان ڕێچکەی سیاسەتی ئێستای ئەمریکا بەردەوام دەبێت بەرامبەر ئۆکراینا یان دەیگۆڕێت. 

 

زانیاریی زیاتر: ئەم وتانەی بیسکۆف لەدوای ئەوە دێن کە بایدن ڕێگای بە ئۆکراینا دا مووشەکی دوورمەودای ئەتاکمز بەکاربهێنێت دژی ڕووسیا.

 

ئەوەی پێویستە بیزانیت: ترەمپ لە کاتی بانگەشەی هەڵبژاردن وتی، ڕێکاری خێرا دەگرینە بەر تا جەنگی نێوان ڕووسیا و ئۆکراینا بە زوویی کۆتایی بێت. بەڵام چۆنیەتی ڕێکارەکەی ڕوون نەکردەوە.