سوودانی لیژنەیەک بۆ دانوستان لەگەڵ گرووپە چەکدارەکان پێکدەهێنێت

ئاڤا نیوز 

 

حکومەتی عێراق بڕیاری پێکهێنانی لیژنەیەکی ئەمنی بۆ گفتوگۆ و دانوستان لەگەڵ گرووپە چەکدارەکان داوە بە مەبەستی بە دوورگرتنی عێراق لە هێرشی چاوەڕوانکراوی ئیسرائیل.

 

وێنە گەورەکە: ئیسرائیل بەبۆنەی گرووپە چەکدارەکانەوە کە لە خاکی عێراقەوە هێرشیان دەکرێتە سەر، هەڕەشە لێدان لەو گرووپە چەکدارانە دەکات و عێراقیش لە ئاستی نێوخۆیی و نێودەوڵەتی هەنگاو سیاسیی و دیپلۆماسییەکانی دەستپێکردووە بۆ ئەوەی عێراق لە ئاگری ئەو شەڕە دوور بخاتەوە کە ناوچەکەی گرتووەتەوە.

 

چیرۆکی سەرەکی: ئەمڕۆ سێشەممە، ئەنجوومەنی وەزیرانی عێراق دانیشتنی ئاسایی خۆی بە سەرۆکایەتی، محەممەد شیاع سوودانی، سەرۆکوەزیران ئەنجامدا.

 

زانیاریی تایبەت: لە کۆبوونەوەکە ئەنجوومەنی وەزیرانی عێراق بڕیاریدا بە پێكهێنانی لیژنەیەكی ئەمنی بۆ گفتوگۆ و دانوستاندان لەگەڵ گرووپە چەكدارەكاندا بۆ بەدوورخستنی عێراق لە هێرشی چاوەڕوانكراوی ئیسرائیل.

 

ئەوەش بزانە: بڕیارە داوا لەو گرووپە چەکدارانە بکرێت خاكی عێراق بۆ هێرشكردنە سەر ئیسرائیل بەکار نەهێنن و هاوكات دوایین هۆشداری ئەمەریكاش دەگەیەننە سەركردەی ئەو گرووپانە.

 

ئەوەی پێویستە بیزانیت: ئەو بڕیارەی حکومەتی عێراق لە کاتێکدایە، هۆشدارییەکانی ئیسرائیل بۆ لێدان لەو گرووپە چەکدارانە لە خاکی عێراق بەردەوامە و لە بەرامبەریشدا هێرشی گرووپە چەکدارەکان بۆ سەر ئیسرائل بەردەوامە.

 

لەلایەکی دیکەوە: ئەمڕۆ موقتەدا سەدر ڕێبەری رەوتی نیشتمانی شیعە، داوای لە سەرایا سەلام [باڵی چەکداری ڕەوتەکە] کردووە بارەگاکانیان لە دیالە بگوازنەوە بۆ دەرەوەی شار.