لە دوو ڕۆژدا لە سووریا 243 چەکدار و سەرباز کوژراون

ئاڤا نیوز

لە دوو ڕۆژی ڕووبەڕوبوونەوەی نێوان گرووپە چەکدارەکانی ئۆپۆزیسیۆن و سوپای سووریا لە باکوور و ڕۆژئاوای ئەو وڵاتە، لانیکەم 243 کەس لە هەردوولا کوژراون، هاوکات ڕێگای نێودەڵەتی بەستنەوەی دیمەشقی پایتەخت بە شارە گەورەکانی باکووری سووریا پچڕاوە.

چیرۆکی سەرەکی: وەک وەڵامێک بۆ بەردەوامی بۆردوومانەکانی هێزی ئاسمانی سووریا و ڕووسیا بۆ سەر پێگەکانی دەستەی تەحریری شام لە پارێزگای ئیدلب، ئەو گرووپە چەکدارەش ڕۆژی چوارشەممە هێرشێکی فراوانی بۆ سەر 10 پێگەی سوپای سووریا لەو دوو پارێزگایە ئەنجامدا و بۆ یەکەمجاریش لەدوای چەندین ساڵ ڕێگەی دیمەشق - حەلەبی داخست.

ڕاگەیێنراوی فەرمی: ڕوانگەی سووری بۆ مافەکانی مرۆڤ بڵاوی کردەوە، لە ئەنجامی دوو ڕۆژ شەڕ و پێکدادانەکانی نێوان سوپای سووریا و ئۆپۆزیسیۆنی چەکداری ئەو وڵاتە بەسەرۆکایەتی  دەستەی تەحریری شام، لە هەردوو پارێزگای حەلەب و ئیدلب زیاتر لە 234 کەس کوژراون.

زانیاری زیاتر: بەگوێرەی ئەو ناوەندەی لە ئەنجامی ڕووبەڕووبوونەوەکان 182 ئەندامی گرووپە چەکدارەکان و 61 سەربازی سوپای سووریا کوژراون، بەگوێرەی ژمارەیەک گرتەی ڤیدیۆییش گرووپە چەکدارەکان دەستیان بەسەر ژمارەیەک پێگەی گرنگ و چەکی قورس و زرێپۆشی سوپای سووریادا گرتووە.

ئەوەی پێشبینی دەکرێت: تائێستا گرووپە چەکدارەکان توانیویانە  دەیان گوند و شارۆچکەی هەردوو پارێزگای حەلەب و ئیدلب لەژێر دەستی سوپای سووریا دەربهێنن، سوپای سووریاش دەڵێت لە ڕووبەڕوبوونەوە و بەرگریکردن بەردەوامن، بەگوێرەی نەخشەی جەنگیش گرووپە چەکدارەکان لە گەیشتن بە شاری حەلەب نزیکبوونەتەوە.

کاریگەری و لێکەوتەکان: دەستەی تەحریری شام دەڵێت، ئەو ناوچانەی کۆنتڕۆڵکراون ئاسانکاری دەکەن بۆ گەڕانەوەی نزیکەی 100 هەزار کۆچبەر بۆ سەر ماڵ و شوێنە ڕەسەنەکانی خۆیان، ئەوەش ئەو نەهامەتییە مرۆییە کەم دەکاتەوە کە باکووری ڕۆژئاوای سووریا پێیدا تێدەپەڕێت.

قوربانیانی مەدەنی: لە یەکەم ساتی هێرشی گرووپە چەکدارەکانیشەوە، فڕۆکە جەنگییەکانی سووریا و ڕووسیا  بەردەوام ناوچەکانی ژێر دەسەڵاتی ئۆپۆزیسیۆن لە باکووری ڕۆژئاوای سووریا بۆردوومان دەکەن، لە دوایین هێرشیشدا 20 هاووڵاتی مەدەنی کوژراون و 33ی دیکەش بریندار بوون.

ئەمەش بزانە: لە ئازاری ساڵی 2020ەوە ئەوە یەکەم گۆڕانکارییە لە ڕۆژئاوای سووریا، کە دەستەی تەحریر شام (بەرەی نووسڕەی پێشوو) خاوەن هەژموونە بەسەر پارێزگای ئیدلب و چەند ناوچەیەکی دیکەی پارێزگاکانی حەلەب، لازقیە و حەمای دراوسێشی لەژێر دەسەڵاتی دایە، لەو هێرشەشیدا گرووپەکانی نزیک لە تورکیا پشتیوانی دەکەن.