هۆشیار زێباری داوا لە حكومەتی عێراق دەکات ڕێوشوێنی خۆپارێزی بگرێتەبەر

ئاڤا نیوز

 

وەزیری پێشووتری دەرەوەی عێراق، داوا لە حکومەتی عێراق دەکات ڕێوشوێنی پێویست بۆ خۆپارێزی بگرێتەبەر بۆ پاراستنی سنوورەکانی لەو گرووپانەی کە پەلاماری حەلەبی سووریایان داوە.  

 

ڕاگەیێنراوی فەرمی: هۆشیار زێباری، وەزیری پێشووتری دەرەوەی عێراق و ئەندامی مەكتەبی سیاسی پارتی دیموكراتی كوردستان لە تۆڕی "ئێکس" ڕایگەیاند: گرووپە چەكدارەكانی سووریا، بەشێكن لە ڕێكخراوی تیرۆریستی داعش و پێویستە حكومەتی عێراق ڕێوشوێنی خۆپارێزی بۆ بەرپەرچدانەوەیان بگرێتەبەر و ڕێگە نەدات بگەنە سنووری وڵاتەکەمان. 

 

زانیاریی زیاتر: هۆشیار زێباری دەشڵێت: بزووتنەوەی ئەحراری ئەلشام و بەرەی نووسرە و گرووپە چەكدارە توندڕەوەكانی دیکە لە حەلەب و ئیدلب لە باكووری سووریا، دەستیانكردووە بە هێرشێكی بەرنامە بۆ دارێژراو، ئەمانە هەمان ئەو گرووپە ئایدلۆجییانەن كە دایەنی ڕێكخراوی تیرۆستی داعش بوون.

 

هاوکات ڕوونیشیکردەوە کە لەم ژینگەیەوە فراوانبوون بەهۆیەوە مووسڵ و ڕەقەیان داگیركرد، بوونە هەڕەشەیەكی نیشتمانی و نێودەوڵەتی بۆ سەر ئاسایشی وڵات، بۆیە پێویستە حكومەتی عێراق بە ئەرکی خۆی هەستێت بۆ پارێزگاری لە وڵات.