قۆناغی سێیەمی سەرژمێریی گشتیی دانیشتووان لە هەرێمی کوردستان دەستیپێکرد

ئاڤا نیوز

ئەمڕۆ شەممە کۆتا قۆناغی پڕۆسەی سەرژمێریی گشتیی دانیشتووان لە هەرێمی کوردستان دەستیپێکرد.

 

وێنە گەورەكە: پرۆسەی سەرژمێریی گشتیی دانیشتووان لە عێراق و هەرێمی كوردستان بەردەوامە و قۆناغی دووەمی سەرژمێری لە هەرێمی كوردستان و عێراق لە ڕۆژانی 20 و 21-11-2024 بەڕێوەچوو كە تێیدا دوو ڕۆژ قەدەغەی هاتووچۆ ڕاگەیێنرا، ئەمڕۆ دوا قۆناغی پرۆسەكە دەستپێدەكات.

 

لێدوانی فەرمی: دڵزار حەسەن، بەڕێوەبەری ئاماری هەولێر بە ئاڤا نیوزی ڕاگەیاند: ئەمە کۆتا قۆناغی پڕۆسەی سەرژمێرییە و بۆماوەی دوو هەفتە بەردەوام دەبێت، هاوکات 77 پرسیار ئاڕاستەی ئەو خێزانەنە دەکرێت کە کارمەندانی بژمێر سەردانییان دەکەن لەبارەی دۆخی ئابووری خێزان و شوێنی نیشتەجێبوون و ژمارەی ئەندامانی خێزان و چەندین پرسیاریی تر.

 

زانیاریی زیاتر: چەندین پرسیاریی تایبەت بە خزمەتگوزارییەکانی بوونی ئاو و کارەبا و شێوازی فڕێدانی خۆڵ و خاشاک و بوونی پێداویستی ناوماڵ لە خێزانەکان دەکرێت بە ئامانجی دیاریکردنی ئاستی بژێوی گشتیی هاووڵاتییان.

 

لەلایەکی دیکەوە: بەڕێوەبەری ئاماری هەولێر، ئاماژەی بەوەدا، ئەو کەسانەی بۆ قۆناغی دووەمی پڕۆسەی سەرژمێریی دانیشتووان گەڕابوونەوە ناوچەکانی دەرەوەی هەرێمی کوردستان، پێویستە ئەندامێکی خێزانەکەیان لەو شوێنانە بمێنەوە بۆ ئەوەی مافی خۆیان بە تەواوی وەرگرن.