ئیبراهیم برۆ: مەترسیی جددی لەسەر كورد لە ڕۆژئاوای كوردستان هەیە

ئاڤا نیوز

 

سیاسمەتدارێكی كورد ڕایدەگەیێنێت كە ئەو شەڕەی لە حەلەب ڕوودەدات مەترسیی جددییە بۆ سەر كورد لە ڕۆژئاوای كوردستان.

 

لێدوانی فەرمی: ئیبراهیم برۆ،سیاسەتمەدار و ئەندامی كۆمیتەی پەیوەندییەكانی دەرەوەی ئەنەكەسە بە ئاڤای ڕاگەیاند: هێرشی گرووپە چەكدارەكانی ئۆپۆزسیۆنی سووریا بۆ سەر حەلەب كتوپڕ بوو و تاوەكو ئێستا بۆچوونی لایەنە نێودەوڵەتییەكانیش سەبارەت بە شەڕەكە ڕوون نییە، تا ڕادەیەك هێرشەكە كاریگەریی لەسەر دۆخی كورد لە ڕۆژئاوای كوردستانیش دەبێت.

زانیاریی زیاتر: شەڕەكە تاوەكو ئێستا لە نێوان گرووپە چەكدارەكانی ئۆپۆزسیۆنی سووریا و سوپای سووریا بەردەوامە، بەڵام ئەو گرووپانە لە ناوچەكانی ژێر دەسەڵاتی پەیەدە و هێزە كوردییەكان نزیك بوونەتەوە، شارۆچكەی تەلڕەفعەت لە سنووری حەلەبە و لەژێر دەسەڵاتی هەسەدەیە كە هێزێكی سەر بە پەیەدەیە.

 

لەلایەكی دیكەوە: ئیبراهیم برۆ ڕایگەیاند: داوا دەكرێت هێزەكانی هەسەدە 32 كیلۆمەتر لەسەر سنووری توركیا دووربكەنەوە، بەپێچەوانەوە ئەگەری ئەوە هەیە پێكدادان لەنێوان گرووپە چەكدارەكانی ئۆپۆزسیۆنی سووریای سەر بە توركیا و هێزە كوردییەكان ڕوودەدات، بەگشتی مەترسییەكی جددی لەسەر كورد لە ڕۆژئاوای كوردستان هەیە.

 

ئەوەی پێویستە بیزانیت: ئێستا زۆرینەی گەڕەك و ناوچەكانی حەلەب بە تەواوی لەژێر كۆنترۆڵی گرووپە چەكدارەكانی ئۆپۆزسیۆنی سووریایە بە گوتەی ئیبراهیم برۆ "بەهۆی لاوازیی میلیشیاكانی سەر بە ئێران و سوپای سووریا هەروەها هەڵوێستی لاوازی ڕووسیا لە هێرشی ئۆپۆزسیۆنی سووریا، ئەو گرووپانە توانیان بە چەند كاتژمێرێك حەلەب كۆنترۆڵ بكەن".