باڵیۆزی ئەمریکا بۆ سەرۆک بارزانی: هیوادارم بە زووترین کات کابینەی دەیەم پێکبهێنرێت

ئاڤا نیوز

 

لە کۆبوونەوەی نێوان سەرۆک بارزانی و باڵیۆزی ئەمریکا لە عێراق، جەخت لەسەر پێکهێنانی کابینەی دەیەمی حکومەتی هەرێمی کوردستان کرایەوە بە هەماهەنگی هەموو لەگەڵ هەموو لایەنە سیاسییەکان.

 

وێنە گەورەکە: سەرۆک مەسعود بارزانی لە پیرمام پێشوازی لە ئەلینا ڕۆمانۆوسکی، باڵیۆزی ئەمریکا لە عێراق کرد، هاوکات لە دیدارەکەدا باس لە سەرکەوتنی پڕۆسەی هەڵبژاردن لە هەرێمی کوردستان و دیارکردنی یەکەم ڕۆژی کۆبوونەوەی پەرلەمان کرایەوە.

 

ڕاگەیێنراوی فەرمی: لەمیانەی دیدارەکەدا باڵیۆزی ئەمریکا، ستایشی ڕۆڵی سەرۆک بارزانی کرد لە نزیکردنەوەی لایەنە سیاسییەکان و باشترکردنی پەیوەندییەکانی نێوان حکومەتی هەرێمی کوردستان و حکومەتی عێراق، سەردانەکەی بۆ بەغدای بە هەنگاوێکی گرنگ وەسفکرد.

 

زانیاریی زیاتر: لە دیدارەکەدا سەرۆک بارزانی، ئاماژەی بە پەیوەندی نێوان حکومەتی هەرێمی کوردستان و ئەمریکادا و باسی لە بەرەو پێشچوونی و فراوانبوونی پەیوەندییەکانی کرد لەگەڵ ئەو وڵاتە هیوای خواست کە گەشی زیاتر بەخۆیەوە ببینێت. 

 

ئەوەی پێویستە بیزانیت: لە کۆبوونەوەکە باس لە کۆتا گۆڕانکارییەکانی ناوچەکە کرا، هەروەها مەترسییەکانی سەرهەڵدان و بەهێزبوونەوەی تیرۆر و ڕێکارەکان بۆ پاراستنی ئارامیی و سەقامگیری عێراق و ناوچەکە تاوتوێ کران.