"سەرۆكوەزیران لە یاری شەترەنج هەمان پلانی خۆڕاگری و هێرشی نەرمی پەیڕەو دەكرد"

ئاڤا نیوز

سەرۆكوەزیران مەسرور بارزانی یاری شەترەنج دەکات و ستایشی هەوڵەكانی یانەی شەترەنجی خانزاد دەكات بۆ ئەوەی یاری هزری شەترەنج بخرێتە نێو پڕۆگرامی خوێندنەوە.

 

لێدوانی فەرمی: دڵزار حەمەساڵح، سەرۆكی یانەی شەترەنجی خانزاد تایبەت بە ئاڤا میدیا ڕایگەیاند، "لە میانەی یارییەکە، پوختەیەك لە دەسكەوت و مێژووی یانەكەم بۆ سەرۆکوەزیران مەسرور بارزانی باسكرد، پاشان باسی ئەوەم كرد كە كتێبی تایبەت بەو یارییەمان داناوە بە ناوی شەترەنجی قوتابخانە، بەپشتبەستن بە سەرچاوە زانستییەكانی وڵاتانی پێشكەوتوو".

 

سەرۆکی یانەی شەترەنجی خانزاد ئاماژەی بەوە کرد، سەرۆكوەزیران مەسرور بارزانی، ستایشی هەوڵەكانی یانەکەی  كردووە کە داویەتی، بۆ ئەوەی شەترەنج وەك بەشێك لە وانەی وەرزش بخرێتە نێو پڕۆگرامی خوێندنەوە، دەڵێت: سەرۆکوەزیران بەڵێنی پاڵپشتی زیاتری پێداوین بۆ پێشخستنی ئەم یارییە هزرییە لە هەرێمی كوردستان.

 

لەلایەکی دیکەوە: سەرۆكی یانەی شەترەنجی خانزاد گوتی، سەرۆكوەزیران لە یاریكردن زۆر هۆشیارە و جووڵەكانی خەسڵەتی كەسی سەركردەیی تێدابوو، بەهەمان پلانی خۆڕاگری كە "پێی ناسراوە" یاری دەكرد و هاوشان پەنای بۆ هێرشی نەرم دەبرد.

 

ئەوەی پێویستە بیزانیت: یانەی شەترەنجی خانزاد بەهەماهەنگی لەگەڵ وەزارەتی پەروەردەی حكومەتی هەرێمی كوردستان ماوەی چەند ساڵێکە كار بۆ ئەوە دەكات کە یاری شەترەنج وەك بابەتێكی هزری و بۆ پێشخستنی هزری قوتابیان بخرێتە نێو پڕۆگرامی خوێندن، بۆ ئەم مەبەستە سەرجەمکارەکان تەواو بووە.