یەکەم پەیامی مەزڵووم عەبدی لەبارەی ڕووداوەکانی سووریا

ئاڤا نیوز

فەرماندەی گشتی هێزەکانی سووریای دیموکرات 'هەسەدە' ڕایگەیاند، بۆ گواستنەوەی هاووڵاتییانی تل ڕەفعەت و شەهبا بۆ ناوچەکانی دیکەی ڕۆژئاوای کوردستان لەگەڵ لایەنەکان لە پەیوەندیدان، بەڵام لە گەڕەکە کوردییەکانی حەلەب بەرگریی دەکەن.

 

وێنە گەورەکە: دوێنێ دەستەی تەحریر شام کۆنتڕۆڵکردنی شاری تل ڕەفعەتی لە باکووری حەلەب ڕاگەیاند و داواشی لە هەسەدە کرد بەبێ ئەوەی ڕووبەڕووبوونەوە لەگەڵیدا ڕووبدات، لە گەڕەکە کوردییەکانی حەلەب بکشێتەوە.

 

بڵاوکراوەی فەرمی: مەزڵووم عەبدی، فەرماندەی گشتی هێزەکانی سووریای دیموکرات 'هەسەدە' لە پەیامێکدا کە لە تۆڕی کۆمەڵایەتی ئێکس بڵاویکردووەتەوە، گۆڕانکارییەکانی باکووری ڕۆژئاوای سووریا بەشێوەیەکی خێرا و چاوەڕواننەکراو ڕوویاندا و هێزەکانیان لە چەند لایەکەوە ڕووبەڕووی هێرشی چڕبوونەتەوە .

 

زانیاریی زیاتر: "دوای کشانەوەی سوپای سووریا هێزەکانمان هەوڵیاندا ڕێڕەوێکی مرۆیی لەنێوان ناوچەکانی ڕۆژهەڵات، حەلەب و تل ڕەفعەدا بکەنەوە بۆ ئەوەی گەلەکەمان لە کۆمەڵکوژیی بپارێزێن، بەڵام هێرشی گرووپە چەکدارانی پاڵپشتیکراو لەلایەن تورکیاوە دروستکردنی ئەو ڕێڕەوەی تێکدا، لەگەڵ ئەوەشدا هەسەدە ئازایانە بەرگری لە گەلەکەمان لە حەلەب، تل ڕەفعەت و شەهبا کرد".

 

بەوتەی مەزڵووم عەبدی، هەسەدە لەگەڵ هەموو لایەنە چالاکەکان لە سووریادا لە پەیوەندیدایە بۆ پاراستنی گەل و دەرچوونی هاووڵاتییان لە تل ڕەفعەت و شەهباوە بەرەو ناوچە ئارامەکانی باکوور و ڕۆژهەڵاتی سووریا، هاوکات بۆ پاراستنی هاووڵاتیانی ناوچە کوردییەکانی حەلەبیش هێزەکانیان لە بەرگریی بەردەوامن.